Odisha rel che suala thi, an nihna hriat lohte ruang hal ral

Odisha, Balasore district-a June 2, 2023-a Shalimar-Chennai Central Coromandel Express rel leh Bengaluru-Howrah Super Fast Express rel insu avanga chet sualna thlenga thi, an ruang lamtu awm lote chu Bhubhaneswar Municipal Corporation (BMC) chuan an hal ral thu an puang.

He rel chet sualnaah hian mi 297 an thi a, mitthi ruang 162 te chu AIIMS Bhubhaneswar-ah dah an ni. Ruang dah zinga 81 te chu an chhungte hnena hlan a ni tawh a, hemi hnu hian ruang la awm te chu DNA test neih niin ruang 53 chu an chhungte hnenah pek leh a ni bawk. AIIMS Bhubhaneswar-ah hian ruang, hlawmtu nei lo 28 la awmin heng ruangte hi AIIMS Bhubhaneswar thuneitute chuan CBI-te awm laiin BMC hnenah hian an hlan.

AIIMS Bhubhaneswar superintendent, Dilip Parida chuan,"BMC hnena ruang kan la kawlte pek chhuah hna chu kan ṭan tawh a, CBI lam pawhin min hmuhpui a ni. Tunah chuan ruang tihral hna chu BMC-te kutah a awm tawh," tiin a sawi.

BMC Mayor, Sulochana Das chuan ruang 28 te chu hal ral an nih tawh thu leh, ruang ṭhenkhat chu hriat harsa khawpa chhe tawhte an nih thu sawiin, mipa nge hmeichhia a nih hriat theih loh an awm a ti. Thla li zet an dah ṭhat avangin ruangte chu an khang vek tawh thu a sawi bawk. "Ruang hal tur leh vuina siamsak tur hian hmeichhiate an lo pen chhuak a ni. Tenna leh rilru danglam pawh pu loin, an sakhaw zawm pawh hre chuang loin ruang hal ral leh vuina hun an rawn siamsak a ni," tiin, Madhusmita Prusty, Smita Mohanty leh Swagatika Rao te chuan ruang hal ral hmasak pathumte chu an kutken thu a sawi.

Ruang hal ralte chu state sorkar dan ang leh central sorkar dan anga an kalpui bakah, National Human rights Commission (NHRC) duhdan pawh an zawm thu sawiin, ruang an hal ral takte DNA pawh thil chhui zel duh a la awm taka an dah ṭhat vek thu an sawi bawk.