Sorkar laipuiin naupang ei hmu ṭha lote enkawlna tur tlangzarh

Union minister for women and child development, Smriti Irani chuan Thawhlehni khan naupang ei hmu ṭha lo leh kham khawp ei tur nei lote zawng a, enkawl a, ṭanpuina tur 'Protocol for management of malnutrition in children' a tlangzarh.

He protocol hi ram puma hman tur a ni a, anganwadi china naupang ei tur nei ṭha lote zawn chhuah bakah, ṭanpuina tura thiltih dan tur ruahmanna siamna a ni. He protocol-ah hian naupangte ṭanpuina atan hian kawng hrang hrang 10 buatsaih niin; naupang chu hmun danga enkawl tur nge, eng ang chaw ṭha nge an mamawh tih leh a hnu zela enkawl chhunzawmna tihte chu endik tur a ni. Heng bakah hian naupangte taksa ṭhan dan te, an ei theih dan vil te, ei tur ṭha nei lote chu an mamawh mil ei tur dik pek te, enkawlna pek an nih hnua ṭhan dan tur dika an ṭhan leh ṭhan loh teh te a tel a, Assam-a an lo hman tawh, anganwadi-a naupang hrisel tak nei nuin naupang hriselna ṭha lo nute a kaihhruaina 'buddy mother' tihte chu a tel bawk a ni.

Protocol hman mek hi naupang, Severe Acute Malnutrition (SAM) chinte enkawlna atan a tawk zo tawh lo a, hei vang hian a hmasa ber atan, tuna anganwadi chin tana protocol thar hi siam leh an nih thu Smirti Irani chuan a sawi. Sorkarin 'Poshan Abhiyan' hmanga chaw ṭha ei tur neih vek dan a ngaihtuah thu leh, an hmalakna chuan naupangte bik a thlur tur thu a sawi bawk. Naupang chaw ṭha ei tur nei lo hriat chhuah leh enkawl hi Mission Poshan 2.0 thil tum pawimawh tak leh 'poshan maah' pawh mi vbc 17 chuangin an hman thu Irani chuan a sawi.