President-in Jammu & Kashmir a tlawh

President Droupadi Murmu chuan ni hnih cham turin nimin khan Jammu & Kashmir a thleng a, Kashmir university convocation a hmanpui dawn bakah Mata Vaishno Devi shrine a tlawh bawk ang.

Nimin khan President Murmu chuan Srinagar-a University of Kashmir convocation vawi 20-na a hmanpui a, tlai lamah tribal pawl ṭhenkhat leh hmeichhe self-help group ṭhenkhatte nen Rashtrapati Bhavan-ah inkawmna hun an hmang bawk a ni.

Vawiinah hian Reasi district-a awm, Trikuti tlanga Parvati Bhavan leh skywalk siam ṭhatte a hawng dawn a, helai hmun hi sakhaw zuitute'n Bhawan area-a shrine tlawhtu lut leh chuak lam innek buai loa an kal theihna tur atana an buatsaih a ni. Sakhaw thila helai tlawh ṭhinte hian luh leh chhuahna lamah harsatna an tawk ṭhin a, kum 2022 kum thar niah pawh innek buai avangin mi 12-in nunna an chan phah tawh a ni. Skywalk hi metre 200-a thui leh metre 2.5-a zau a ni a, Rs. vbc 9.89 senga thawm ṭhat a nih thu shrine thuneitute chuan an sawi. Shrine thuneitute chuan nikum khan Radio Frequency Identity Card (RFID) siamin, sakhaw thila helai tlawhtute dinhmun hriatna atan an hmang a, ṭum khatah mi 6,000 chuangte an kal ṭhin avangin skywalk pawh hi chet vel awlsamna atan siam a ni.