Rajasthan Congress buaina chingfel ta

Rajasthan-a rorellai, Congress party chhunga buaina chu chinfel a ni ta. 

Rajasthan deputy chief minister hlui, Sachin Pilot leh a thlawptu MLA eng emaw zat chu chief minister Ashok Gehlot lakah lungawi loin an hel a, hei vang hian Pilot pawh deputy CM leh state unit Congress president a nihna pawh hlih sak a lo ni tawh a ni. Hun rei tak an buai hnuah, central lama an party hruaitute hma laknain an buaina hi an chingfel thei ta a ni. 

CM Gehlot chuan Thawhlehni zan khan MLA lungawi lote hi an awmna, Jaisalmer hotel-ah a hmu. MLA-te hian an lungawi loh thu pawh lo sawiin, mahse inremna siam a nih hnuah an vai chuan boruak ṭha zawk siam tuma hma lam an pan a ṭul thute an lo sawi a ni. Gehlot chuan an boruak tawn chu theih­nghilh a, inngaidam tawn a, hma lam pan a ngai tih a sawi ve bawk. 

Sachin Pilot pawh Rahul Gandhi leh Priyanka Gandhi Vadra a hmuh hnuah Thawhṭanni khan Rajasthan-ah a kir tawh a ni. Thla khat dawn party chhunga buaina an neih hnuah, Pilot leh Rahul Gandhi-ten Thawhṭannia meeting an neihah buaina hi an chingfel ta niin an sawi a ni. Congress party chuan Rajas­than-a an buaina chu tawp ta tih sawiin, MLA-te chuan Rajasthan hmasawnna turin theihtawp an chhuah zel dawn tih a sawi.