PM Modi-a'n China President lehkha a thawn Ṭanpui theihna kawnga puih a inhuam

Prime minister Narendra Modi chuan Pathianni khan China president Xi Jinping hnen­ah lehkha thawnin, novel corona­virus (2019-nCoV) vanga an ramin harsatna a tawh mekah ṭanpui turin India a inhuam tih a hrilh.

Narendra Modi chuan President leh China mipuite chu a tawrhpui thu sawiin, hri leng inṭanna hmun leh a zualna hmun ber Wuhan khawpui aṭanga India mi awm 650-te an chhuahna tur kawnga hma a lakpuinaah lawmthu a hrilh bawk. 

Chinese ambassador to India, Sun Weidong pawhin PM chu a lehkha thawn avang hian twitter kaltlangin lawmthu a hrilh a, India sorkarin lehkhthawn duh­awm tak leh thlawpna an lantir chu lawmawm a ti hle tih sawiin, hri leng pawh chu tihtawp thuai theih a rin thu a sawi a ni.

Sorkar laipui chuan February 1 leh 2 khan Wuhan-a India mi chengte a lachhuak a, heng mite hi Delhi leh Haryana-a Manesar-ah an tana a hrana hmun siamah dah an ni mek.

Coronavirus hi India rama a lo luh lohna turin sorkar chuan nasa takin hma a la mek a, airport, lawng chawlhna hmun leh Nepal ramriahte chuan enfiahna tur a dah vek a ni.

India mi pathumin an vei tih hmuhchhuah a ni tawh a, heng mite hi Kerala mite vek niin Kerala sorkar chuan health emergency a puang hial tawh bawk. An state chhunga rinhlelh chhungkaw eng emaw zat chu sorkar hian a enfiah reng a, midang nena an inlenpawh an phal lo bawk.

Union health minister Dr Harsh Vardhan chuan nimin khan novel coronavirus lo do let tur hian India chu a inpeih tih a sawi.

Lok Sabha-a hemi chung­changa thu a sawinaah Harsh Vardhan chuan sorkarin a ṭul ang zawng zawngah chuan hma a la tih leh thil awmdan uluk taka a thlithlai thu a sawi a ni.

Sorkar chuan Coronavirus enfiah tur hian panel a din a, Health Ministry pawhin video call hmangin ram dang an bepawp reng a ni, a ti.

Minister chuan a Ministry kaihhruai chuan nitin enfiahna hi a kalpui reng tih sawiin, nimin thleng khan thlawhtheihna 1,118 chu enfiah an ni tawh niin a sawi. Wuhan-a India zirlai awmte chhanchhuahna kawnga medical staff inrawlhte chu lawmthu a hrilh nghal bawk a ni.