Rajasthan Assembly inthlan hun sawn a ni

Election Commission of India (ECI) chuan Rajasthan assembly inthlan hun atana November 23 a lo puan tawh chu November 25-ah a sawn.

ECI hian Rajasthan assembly inthlan chu November 25-ah neih zawk tur a nih thu hi nimin khan a puang a, sorkar notification hi October 30-ah siam tur niin, nomination theh luh hun hnuhnung atan November 6 leh inhnuhdawh hun hnuhnung atan November 9-te ruat a ni bawk. Vote chhiar hun erawh a danglam dawn lo a, December 3-ah vote chhiar tur niin, December 5 hmain inthlan kaihhnawih hi zawh fel vek tur a ni.

November 23 hi Hindu-te'n 'Dev Uthani Ekadashi' an hman hun niin, he nia innei tur hian mi tam takin ruahmanna an siam ṭhin. Hei vang hian ECI chuan political party bakah pawl hrang hrang leh social media aṭanga ngenna dawngin, inthlan hun hi a sawn ta a ni. November 23-ah hian innei tur tam tak an awm bakah, khawtlang huaihawt pun khawmna tur a tam avangin, vote thlak an tlem a hlauhawm a, tam tak tan harsatna a thlen dawn bawk avangin inthlan hun chu a sawn ta niin n sawi.

Union Minister, Gajendra Singh Shekhawat pawhin ECI hnenah hian Rajasthan assembly inthlan hun sawn tur hian a lo ngen tawh a ni. Rajasthan aṭanga BJP MP leh Law Minister hlui ni bawk, PP Chaudhary chuan ECI hnenah inthlan hun sawn tura ngenna hi ziakin a lo thlen bawk a,"Election Commission mai bakah keimahni ngei pawhin vote tla a tam theih nana hmalak hi kan mawhphurna a ni. Mi te ber pawhin India rama democracy tundin a nih theih nan hian tel vena an neihna chu vote thlak hi a ni a, hetih lai hian EC-in inthlan ni tura a ruatah hian hunpui hmang tur an tam avangin kan thil tum ber hi a hlawhchham ang tih a hlauhawm a ni," tiin a ziak.