Israel-a India mite thiar chhuak dawn

External affairs minister S. Jaishankar chuan Israel leh Palestine indona avanga Israel-a India khua leh tui tangkhang mekte hruai chhuahna tur thlawhtheihna an ruahman thu a sawi. Israel aṭanga India mite hruai haw hna hi 'Operation Ajay' an vuah.

Jaishankar chuan,"Operation Ajay hmangin India khua leh tui, Israel aṭanga lo let duhte tan thlawhtheihna ruahman a ni a, inbuatsaihna ṭul dang pawh kalpui mek a ni. India mi tu pawh lo let duh an awm chuan chung mite himna leh damna chu kan ngaihpawimawh ber a ni," tiin X-ah a post. Israel-a Indian embassy chuan,"India-a haw duh hming pe midang tan pawh thlawhtheihna hi ruahman belh zel a ni ang," tiin an tarlang. Israel leh Palestine indo avang hian Air India chuan Delhi-Tel Aviv inkar thlawhtheihna service chu a lo titawp lailawk tawh a ni.

Israel leh Palestine indo tirh aṭang khan Ministry of External Affairs chuan 24 hour control room New Delhi, Tel Aviv leh Palestine-a Ramlallah-ah te siamin, indona dinhmun leh indona kara India mite vilna tur atana buatsaih a ni. Israel-a university leh zirna in hrang hrangah India mi zirlai hi 900 vel an awma hriat a ni a, sumdawng leh hna dang thawk pawh mi eng emaw zat an awm.