Bihar rel che sualah mi 4 an thi, mi 40-in hliam an tuar

Bihar-a Buxar district-a Raghunathpur rel station bulah Assam pana tlan, North East Superfast Express rel chu che sualin, hriat theih chinah mi 4 an thi a, mi 40 an hliam.

Buxar SP, Manish Kumar chuan Railway Police force official hliam tuar pawh an awm thu a sawi a, hliam na zualte pawh AIIMS Patna lamah thawn nghal an nih thu a sawi. Rel chet sualna hmunah hi East Central Railway response team-te chuan thleng nghalin, khaw mipui ṭhenkhat nen hliam tuar ṭanpui leh chhanchhuah hna an thawk. Bihar-a rel che sual avang hian Indian Railways chuan rel 10 an cancel nghal a, rel 21 dang chu a kawng an thlak bawk a ni.

East Central Railway Chief Public Relations Officer, Birendra Kumar chuan rel chet sual chhan chu high-level inquiry neih a ni dawn niin a sawi. Rel chet sualnaa nunna chan chhungte hnenah Rs. nuai 10 ṭheuh pek an nih tur thu leh, hliam tuarte chu Rs. 50,000 pek an nih tur thu a sawi bawk.