INDIA-in Meta leh Google hnenah lehkha thawn

Eptu party intelkhawm, INDIA chuan Google leh Meta CEO, Sundar Pichai leh Mark Zuckerberg-te hnenah lehkha thawnin, nakkum Lok Sabha inthlan lo awm tur atan Meta leh Google platform hrang hrangahte duhsak lam neia thil kalpui lo turin an ngen.

Lehkha hi Congress general secretary KC Venugopal chuan a hming ziah hnanin, Congress hruaitu Mallikarjun Kharge leh Rahul Gandhi bakah party dang 28 hruaitute remtihnaa thawn an ni.

Google leh Meta hnena INDIA lehkha thawnah hian an hnuaia platform hrang hrangah eptute chu duhsak lo bik leh, sorkar lai duhzawng leh chawikanna tur thil post-te chu an vawrh chak ṭhin hle thu an sawi."Political party pakhat duhsak bik leh puihna hmanrua atan, an ṭhatpui tur thil post uchuak taka vawrh chak bik a ni chu INDIA chuan India ram democracy tihchhiatnaah kan ngai tlat a ni," an ti.

Zuckerberg-a hnena an lehkha thawnah hian US-a chanchinbu 'Washington Post' article pakhata mi "India nawrna avangin Facebook chuan inhuatna thusawi leh tum nei ṭha lo thilte an vawrh darh" tih chu thai langin, hetiang thil hi sorkar lai duhsakna thil a ni tih chiang takin kan hria a, vawi tam tak kan lo tlangaupui tawh ṭhin bawk a ni, tiin an sawi.

INDIA chuan CEO pahnihte hnenah hian neutral taka awm tur leh India inthlan boruak tichhe thei thil, an platform hmanruaa hman theihna chu lo dang zel turin an ngen. Meta leh Goolge chu eptu party hruaitute post leh kaihhnawih thil darhzau tur dang ṭhin leh, sorkar lai party hruaitute kaihhnawih thil erawh thui tak tak thleng tura vawrh darh leh ṭhin niin an puh a ni.