Global Hunger Index-ah India 111-na

Global Hunger Index (GHI) 2023 chu tihchhuah niin India chuan point 100 hmuh theih aṭangin point 28.7 a hmu a, ram 125 zingah 111 a ni.

Global Index score-ah hian point 0 hmu chu a ṭha ber a ni a, hei hian ei tur kham khawp hmu lo leh rilṭama khawsak ngai an awm lo tih a entir a ni. India dinhmun hi GHI chuan ṭha lo zingah a dah.

Tehna atan hian thil chi hrang hrang pali; taksa mamawh ei tur hmu lo, naupang a nih tur aia te, naupang a nih tur aia cher leh kum 5 hnuai lam thih tam lam te hman a ni. India hian kum 2000 leh 2015 inkar khan nasa taka hma sawnin 2000 kuma point 38.4 nei chu 2015-ah chuan point 29.2-ah a tla thla tawh a ni. Hetih lai hian tun kum riat ral ta chhung khan a hmasawnna hi a muang a, point 0.5 chauh a la paih a ni.

Sorkar laipui erawh chuan GHI report hi a zawna a kum thum nan a sawisel leh a, GHI-in naupang ei hmuh ṭhat loh avanga a nih tur ang aia cher a tehnaah NHFS 5 a hman thu leh, India Poshan Tracker a hman loh thu a sawi. Ministry of Women and Child Development (MoWCD) chuan GHI tehfung chu rintlak tawk lo leh India dinhmun an tarlan chu a dik theih loh thu an sawi.

MoWCD chuan naupang a nih tur aia cher tehna atan hian GHI chuan 2019-2021-a khawvel huap Joint Malnutrition Estimates Joint Data Set, Survey Estimates-a National Family Health Survey 5 an la hman thu sawiin, sorkar laipui buatsaih, Poshan Tracker portal-ah chuan naupang kum 5 hnuai lam vbc 7.24 zingah an nih tur aia cher naupang hi 7.2% chauh an awm a, GHI hman, NFHS 5-ah erawh 18.7% a ni thung a ni, a ti.

GHI-ah hian Afghanistan leh Haiti bakah sub-sahara ram 12 te chu India aia tichhe zawkte an ni a, Europe leh Central Asia te chuan point 6.0 hmuin GHI-ah hian a tiṭha ber ramte an ni thung.