Israel aṭangin India mi 212 hruai haw

Sorkar laipuiin Israel leh Palestine indona avanga Israel-a tangkhang, India khua leh tuite thiar chhuah hna 'Operation Ajay' a thawh mekah, India tirh thlawhtheihna hmasa ber chuan mi 212 phurin nimin khan India an rawn thleng tih an puang.

India mi, indona avanga Israel aṭanga lo haw duhte hi an hming pe hmasa apiang hruai haw an ni a, India-in thlawhtheihna pakhat a tirh hmangin mi 212 an thiar chhuak phawt a ni. Israel-a India embassy chuan thuchhuah siamin, India mi zingah Israel chhuahsan duh in report hi tam tak an la awm a, an haw na tur thlawhtheihna pawh ruahman zel a nih tur thu a sawi. Israel-a India mi tangkhang tam tak hi Air India-in indona avanga October 7-a New Delhi leh Tel Aviv inkar thlawhtheihna service a tihtawp lailawk thut vang a ni. Israel-ah hian India mi 18,000 chuang an awm mek nia hriat a ni.