Pakistan sorkar thlawpin Mumbai beih tur ruahman : Headley

Pakistani-American David Coleman Headly chuan kum 2008, November 26-a Pakistan firfiakten Mumbai khawpui an beih kha Pakistan firfiak pawl, Lashkar-e-Toiba ruahman niin, Pakistan Inter-Service Intelligence (ISI) leh Pakistan Amry-in an pawmpui thlap a ni, a ti.

National Investigative Agency (NIA) in thu a zawhnaah, Headly chuan a hnenah thil tih dan tur hrilhtu chu Pakistan ISI Major Iqbal leh Sameer Ali an nih thu a sawi a, LeT hruaitu Zaki-ur-Rehman Lakhvi chu ISI Brigadier-an a kaihruai thung niin a sawi.

Pakistan intelligence agency leh Pakistan Army-ten firfiakte chetna an thlawp thu sawiin, Headley chuan ISI hotu Suja Pasha chuan 2008 pawikhawihna kaihhnawiha Zakiur Rehman Lakhvi man a nih pawh khan a tlawh a ni, a ti. Firfiakten Mumbai khawpui an beih kha Pakistan in a thlawp a ni, a ti.

Headley chuan ISI hian an beih tur hmunhma te enthlithlai tura tirin pawisa an pek thu a sawi a, 2008-a Mumbai khawpui beih a nih hma pawh khan vice-president chenna, India Gate leh New Delhi-a CBI office-te pawh a lo thlithlai tawh thu a sawi bawk.

Special Public Prosecutor Ujjwal Nikam chuan vawiin hian video conference hmangin Headley hi Mumbai court hmaah a inlan dawn a ni. Headley hi thubuai 11 siamsak a ni.

Kum 2008-a firfiakten Mumbai khawpui an beih kaihhnawihah Headley hi kum 2009 khan FBI ten O'Hare International Airport, Chicago-ah Pakistan a pan tur an man a, kum 35 tang turin US court chuan 2013, January 24 khan a hrem. Mahse pawikhawihna thleng chungchanga thuhretua ṭan a remtih hnuin nikum December 10 khan court chuan a lo ngaidam tawh a ni.

Pakistan firfiak 10 chuan kum 2008, November 26 khan Mumbai khawpui beiin, Taj Mahal Palace, Jewish outreach centre leh hmundang eng emaw zat an bei a, mi 166 an thih bakah mi dang 300 chuangin hliam an tuar. Firfiakte pakua-te hi security force-ten an kaphlum nghal a, nungdama man awmchhun Ajmal Kasab chuan kum 2012, November 21 khan Yerawada jail, Pune-ah khaihlum a ni. Mumbai beitu firfiakte hian Headley-a map leh video-te hmangin, tuipui aṭangin Mumbai khawpui hi an lut a ni.