Siachen aṭangin sipai lakchhuah tum lo

Jammu and Kashmir-a Siachen Glaciers-a vur tawlhin sipai 10 a chhilh hlum hnuah he hmuna sipai dahte lachhuak tur nawrna awm mah se, Defence Minister Manohar Parrikar chuan sipaite lakchhuah tum a nih loh thu a sawi.

Minister Parrikar chuan, "Sipai 10-te thihna thleng chu pawi ka tiin mimal tak pawhin a na ka ti hle, mahse Siachen aṭanga sipai lakchhuah ringawt hi thil tih chi a ni lo" a ti.

Parrikar chuan Siachen-a sipai dah an nih chhan chu ram himna tur ngaihtuah vang a ni tiin, he hmuna hmanruate tihchangtlun zel a nih avangin tun hnaiah nunna chan pawh an tlem sawt hle tih a sawi.

Minister chuan, "Siachen-a thuneihna kan chan theihna atan kan sipai sang telin nunna an chan tawh a ni", vur tawlh avanga sipai 10 ten thihna thleng chu inpuahchah ṭhat loh vang ni loin, khuarel thil thleng, sawi lawk theih loh a nih vang a ni, a ti. Sipai 10-te ruang hi hmuh a la ni lo a, theihtawp chhuaha zawn mek a nih thu a sawi bawk.

Kum 2005 khan khatih laia Prime Minister Manmohan Singh chuan khawvela indona hmun sang ber, Siachen chu sipaite lachhuak kher loin hmun ralmuang taka a siam theih a ni tiin alo sawi tawh. He hmunah hian India leh Pakistan chuan sipaite an dah a, a hmun hi a vawh em avangin indona avang aiin khawvawtin sipai a hmehhlum hi an tam tawh zawk a ni. Siachen vawh lam hi -50C te a tling ṭhin a ni.