Kum 9 chhungin medical college a letin a pung : Health Minister

Union health and family welfare minister, Mansukh Mandaiviya chuan Inrinni khan Shillong NEIGRIHMS-ah regional cancer a hawng a, he hunah hian India ramah kum kaw chhungin medical college-te chu a letin an pung niin a sawi. Mandaiviya chuan ram chhunga district tinah sorkar chuan nunna derthawng zual tak takte enkawlna tur bik, critical care unit a din vek thu a sawi bawk.

Shillong-a hun a hmannaah hian Health Minister chuan 2014 kuma MBBS seat 50,000 awm ṭhin chu 1,07,000-ah an tihpun tawh thu sawiin, undergraduate medical college thar te, nursing college leh inzaina room enchhin tur leh thil dang eng emaw zat a hawng nghal a ni. "Kum kaw chhung khan kan ram medical college awm zat chu a letin a pung hman a, India ram hmun hrang hrangah Health and Wellness Centre 1,70,000 siam belh a ni bawk. NEIGRIHMS-a hmanraw thar an dah leh khawl an neih belh chuan mipuite hnena an mamawh em em inenkawlna a pek theih ngei ka beisei. Sorkar laipui hian Northeast ṭhanna tur ngaihtuah hi a ngaipawh em em a ni," tiin a sawi.

Minister chuan khawvel ram dangte chuan health system inkhaidiat chhawng thum an hman thu leh, India erawh chuan chhawng li an hman mek; ASHA, primary, secondary leh tertiary service te chu an chhuan thu a sawi. Mandaiviya chuan ram pum tan Rs. vbc 64,000 ruahman a nih thu leh, chu chu kum li chhunga district tin tan Rs. vbc 100 a nih thu a sawi bawk.