UP-a jail-ten radio station hran nei vek dawn

Uttar Pradesh-a jail hrang hrangte chuan kum 2021-ah in-house radio station an nei vek dawn a, heng station-te hi jail tang zinga miten an enkawl nghal dawn a ni. 

Director General (prison administration and reform services) Anand Kumar chuan Meerut district jail-a in-house radio station a hawnnaah he thu hi a sawi a ni. DG Anand Kumar chuan, "Jail tang zinga eng emaw zat chu depression neite an ni. Hei vang hian intihhlimna lam chi siamsak a, an rilru lakpen sak a, depression an beih let theih dan tur ngaihtuah sak hi ṭha kan ti a ni. Jail tang zinga mite chu heng radio station-te hi enkawl turin ruat an ni tel ṭhin dawn bawk a ni," a ti. 

Jail-a radio station an siam aṭang hian hla thlan bikte an play sak ṭhin dawn a, hei bakah hian radio jockey chuan dan leh hrai chungchang te, jail tangte dikna chanvo neihte a chhiar chhuak sak ṭhin bawk ang. Court hearing neih hun te, jail chhunga program an neih ṭhinte puanzarna atan hman a ni dawn bawk a ni. 

State sorkar chuan an state chhung jail 70-ah in-house radio station hi nakkum chhungin dah kim hman vek a tum.