Ni ruk zet vurin a chhilh hnuah Siachen-ah sipai chhanchhuak

Jammu and Kashmir-a Siachen Glaciers-a vur tawlhin a chhilh, sipai 10 zinga pakhat chu ni ruk an zawn hnuah nimin zing khan nungdamin hmuh a ni a, mahse a dinhmun erawh a ṭha lo hle.

Chhanchhuah hna thawktute chuan nimin zing khan vur tawlhin a chhilh zinga mi, Lance Naik Hanamathappa hi an chhanchhuak a ni. Midang pakuate ruang pawh hmuh a ni tawh bawk.

Indian army commander DS Hooda chuan nungdama Hanamathappa an chhanchhuak chu thil mak a nih thu sawiin, a dam ṭhat zel theihna atan thil mak a thlen chhunzawm zel a beisei thu a sawi.

DS Hooda chuan chhanchhuah hna thawktute tan pawh hna hautak tak a nih thu a sawi a, "Vur tawlh pangngai ang a ni lo a, sipaite chhilhtu hi vur tlang sak tak ang mai a ni" tiin, an awmna chin hriat nan hian uifing bakah radar danglam bikte an hmang tih a sawi. An zawn chhung pawh hian vur thli a tleh nasat avangin chhanchhuah hna thawktute pawhin harsatna an tawk a ni.

Sipaite hi vur hnuai feet 25-a thuk, a vawh lam pawh -45C ah hmuh an ni a, Hanamathappa hi air pocket avangin nungdamin a lo la awm a ni.

Chhanchhuaktu pawlten an hmuh lai hian Hanamathappa hi nikhaw hre loin a lo awm a, a marphu pawh a muang tawh hle. Hanamathappa hi special air ambulance hmangin Delhi-ah hruai nghal a ni a, Army Research and Referall Hospital-a ICU-ah dah niin a dinhmun a ṭha lo hle. Prime Minister Narendra Modi leh Army Chief Dalbir Singh-te chuan nimin khan damdawi-inah an tlawh nghal a ni.