ISI-ten LeT sumin an pui - Headley

Lashkar-e-Taiba firfiak, David Headley chu nimin khan video conference hmangin Mumbai-a special TADA court hmaah a inlan chhunzawm leh a, prosecutor-te zawhna hrang hrang a chhang.

David Headley chuan kum 2008-a Mumbai khawpui beitu Pakistan LeT firfiakte chu Pakistan intelligence agency, ISI chuan an thlawp bakah sum hmangin an pui a ni, a ti. Hei bakah hian ISI chuan Indian Army aṭanga spy tur zawng tura an tih thu a sawi bawk.

Headley chuan Pakistan firfiak pawl, Lashkar-e-Toiba, Hizbul Mujahideen leh Jaish-e-Mohammed te chu United Jihad Council hnuaiah an thawhho thu leh, an thupui ber chu India beih a ni, a ti.

2008-a Mumbai khawpui beih a nih hma khan LeT hian kum 2007 khan Mumbai-a Hotel Taj-a Indian defence scientist chu beih an lo tum tawh a, mahse an ralthuamte a huna an hmuh hman tak loh avangin an
ṭhulh tih a sawi.

Nimina zawhna hrang hrang a chhan zinga ṭhenkhatte chu -

• LeT tan bakah Pakistan intelligence agency, ISI tan a thawk bawk a, Pakistan Army-a mi pawimawh eng emaw zat a hmu.
• ISI leh Lashkar-te chu an thawkdun ṭha hle a, "ISI hian an thlawp bakah sum pawhin an pui ṭhin a ni".
• ISI hian LeT chauh ni loa, fifiak pawl dang Hizbul Mujahideen leh Jaish-e-Mohammad te pawh an pui bawk ṭhin. Jaish-e-Mohammad hi January thlaa Punjab-a Pathankot airbase beitute nia rinhlelh an ni.
• LeT leh firfiak pawl dangte chu United Jihad Council hnuaiah an thawk ho a, an thupui ber chu India rama pawikhawihna thlen a ni.
• 26/11-a Mumbai beih a ni hma khan, LeT chuan Mumbai Taj hotel-a Defence Scientists meeting neih tum chu beih an lo tum tawh bawk. Mahse, meeting hi ṭhulh a nih tak avang leh, an ralthuamte a thlen hman loh avangin an bei ta lo a ni.
• LeT handler Sajid Mir chuan Mumbai-a Sidhivinayak temple chu en thlithlai tel turin a tir a, mahse he temple hi 26/11-a beih zingah a tel lo.
• 26/11-a pawikhawihna thlenna tur ruahmantu ber, Hafiz Saeed leh Zaki ur Rehman Lakhvi-te chu thurawn pein, US-in LeT hrekna a siam chungchang khing let turin a hrilh.