Sipai chhanchhuah dinhmun a ṭha lo

Jammu and Kashmir-a Siachen Glaciers-a vur tawlh, feet 25-a chhahin ni ruk zet a chhilh hnua an chhanchhuah, Lance Naik Hanumanthappa chu New Delhi-a sipai damdawi-inah enkawl mek a ni a,a dinhmun a ṭha lo hle.

Hanumanthappa hi Army Research and Referral Hospital-ah enkawl a ni a, damdawi-in thuneitute chuan nikhaw hre loin a la awm a, a dinhmun a ngaihtuahawm hle tih an sawi.

Doctor-te chuan Hanumanthappa hi a BP a hniam hle a, damdawi-inah hruai thlen a nih aṭangin ventilor hmantir a ni thu an sawi. Pneumonia a nei a, a kal leh thin te pawhin hna an thawk ṭha lo a, mahse vurin a taksa peng a seh hit (frostbite) leh ruh tliak erawh a nei lo tih an sawi.

Sipaite chuan vur tawlhin sipai 10 awmna a chhilh lai hian Hanumanthappa hi puan-in chhungah a lo awm tih an sawi. Puanin hi khawvawt zual aṭanga an inven theihna tura duan a ni a, a chhungah hian air pocket a awm tel avangin sipai pawh hi a damchhuah theih phah a ni.