Telangana MLA-ten hlawh pun an phut

Telangana MLA-te chuan an hlawh chu 200% a tihpun an phut.

MLA-te hian Thawhlehni khan Chief Minister K Chandrasekhar Rao hmuin, an hlawh thla khata Rs 95,000 an lak ṭhin chu cheng nuai thuma tipung turin an phut a ni.

Telangana hian MLA 119 a nei a, MLA leh minister-te hlawh atan hian kum khatah cheng vaibelchhe 15 vel a seng mek a ni.

India rama state naupang ber, Telangana hi kum 2014 June thlaa Andhra Pradesh aṭanga din a ni a, nikum chhung khan an state hi loneitu leiba ngah vanga intihlum tamna ber an ni. Loan rulh theih loh vang te, khawkhengin an thlai chinna hmuna tihchhiat vangtein state chhunga loneitute chuan harsatna an tawk a ni.

Loneituten sum lama harsatna nasa tak an tawh laiin, nikum khan Chief Ministre KCR chu private jet hmangin China-ah a zin a, state sum cheng vaibelchhe hnih chuang a hmang. Hei hian sawisel pawh a hlawh zui hle.

Nikum December thla khan CM hian ruah dila ṭawngṭaina leh,loneitute tana malsawmna dila ṭawngṭaina hun hautak zet a buatsaih bawk.

Inkhawm a buatsaiha senso hi state sum hmang loin, CM thlawptu sum thawhkhawm hman a ni a, cheng vaibelchhe sarih vel an seng a ni.

Telangana-a rorellai, TRS MP Jithender Reddy chuan legislator-te hlawh tihsan chu an state-a eiruk umbona atana thil pawimawh a nih thu a sawi. "Telangana hi eirukna laka fihlim leh rorelna ṭha awmna state-a siam kan duh a ni. Hemi atan hian fund leh hlawhte pawh ṭha taka pek kan duh a ni" a ti. Kum 60 chhung zet Telangana state din turin an bei a, state pek an nih tak avangin sum lakluhna hran an nei tawh a, state chhunga mi harsate an chhawmdawl mek tih a sawi. "Mi harsa zawkte chawikanna tur scheme pawh tam tak kan siam a ni" a ti.

Hetihlai hian eptu party, Congress chuan MLA hlawh tihpun rawtna hi a sawisel thung a, loneitute dinhmun chu ngaihtuah hmasak a ngai a ni, a ti. All India Mahila Congress president Shobha Ojha chuan, "Telangana state-ah loneitu za tel intihlum an awm a, hetihlai hian Chief Minister chuan zin kualna atan sum tam tak a seng a, MLA-te hlawh tihsan tum a ni leh te hi thil awmlo leh vanduaithlak tak a ni" tiin a sawi.