Netaji Bose tana ngenna Home Ministry ngaihtuah tir dawn

Madras High Court chuan Union Home Ministry hnenah Netaji Subhas Chandra Bose hnena chawimawina sang, Bharat Ratna hlan tura ngenna siam chu ngaihtuah turin a hrilh.

Justice MM Sundresh leh Justice S Vimala awmna division bench chuan Managing Trustee of Tamil Nadu Centre for Public Interest Litigation KK Ramesh-a PIL thehluh a ngaihtuahnaa he thu hi a sawi a ni. Ramesh-a hian Netaji Bose-a hnena chawimawina sang hlan bakah, a piancham January 23 chu public holiday atana puang turin a ngen.

Bench chuan, "He mi chungchang hi Union Home Secretary ngaihtuah tur a ni" tiin thutlukna a siam.

Petition thehluttu hian, "India mi zawng zawngin Subas Chandra Bose chu chawimawi an duh a, tumahin ram zalenna tura a inpekna te kha an theihnghilh dawn lo a ni" a ti. January 27 khan Union Home Secretary hnenah ngenna hi a thehlut a, mahse chhanna a hmuh mai loh avangin High Court lamah a zualko a ni.