Sri Lanka-ah India mi sangha mantu 27 man

Sri Lanka navy-te chuan India mi sangha mantu, Sri Lanka tuipui china sangha man mi 27-te an man a, an lawng panga an mansak tel bawk. Heng sangha mantute hi Tamil Nadu-a Ramanathapuram-a chengte niin, Mannar pelha Sri Lanka tuipui chin, Delft leh Jaffna-a Kachchativu Island vela an sangha man lai man an ni.

Ramanathapuram-a sangha mantu intel khawmte chuan Sri Lanka-in an mi leh sate an man avang leh an lo haw leh vat theih nana sorkar nawr nan, tiam chin awm loa an hnathawh zawng zawng an titawp nghal. Naktuk aṭanga nawrh huaihawt an tum hian sangha mantu 7,000 te a nghawng dawn.

Tamil Nadu chief minister MK Stalin chuan external affairs minister, S. Jaishankar hnenah an buaina hi thlenin, India mi sangha mantute man chungchang chu sorkar laipuiin ngaihven a, inbiakna neihpui vat turin a ngen. Stalin chuan, sangha mantute man an ni fo chuan tuipui kama sangha mana ei zawngte a tihhlauhthawn thu sawiin,"Sangha mana eizawng leh an chhungkaw tana channa a nih mai piah lamah, an sangha mana innghat mi tam tak ei tur leh nunphung a tibuai tel a ni," a ti.

Union minister of state for fisheries, L Murugan chuan Sri Lanka sorkar nena inbiakna mumal tak neiha an buaina chin fel a nih tur thu a sawi a, sangha mantute pawh an nawrh tum chu titawp turin a ngen. Minister chuan sangha mantute chu an nawrh avanga chu lai hmun vela cheng mi 15,000 te'n an tawrh theih dan tur ngaihtuah tel turin a ngen bawk.

Tun kum 10 chhung khan an tuipui china sangha man avangin Sri Lanka navy-te hian India mi sangha mantu mi 600 lai an that tawh. Tun hnaiah inthahna awm lo mah se, sangha mantute lawng an mansak ṭhin chuan mi tam tak eizawnna a tichhia a ni. Sri Lanka navy-te hian kumin chhung hian lawng 22 leh India mi sangha mantu 137 an man tling tawh a ni.

Hetiang buaina boruak karah hian Tamil Nadu sorkar chuan sorkar laipuiah thil phut pahnih a nei a; India-in kum 1970 vela Sri Lanka hnena a pek, Katchatheevu island chu la let tur leh, Sri Lanka nena hun rei zawk atana inremna ṭha tak siam a, sangha mantute tana sangha man phalna pek chu a kawng pakhat niin an sawi bawk.