Siachen aṭanga sipai chhanchhuah a thi

Jammu and Kashmir-a Siachen Glaciers-a vur tawlhin ni ruk zet a chhilh hnua an chhanchhuah, Lance Naik Hanamanthappa Koppad chu Delhi-a sipai damdawi-inah nimin khan a thi.

Indian Army senior official chuan nimin chhun dar 11.45 khan Lance Naik Hanamanthappa hi a thi tih a sawi. Political party leh hruaitu hrang hrangin an ui thu an sawi. Prime Minister Narendra Modi pawhina twitter-ah a ui thu a ziaklang.

Kum 33 mi, Lance Naik Hanaman-thappa hi Madras Regiment 19th Battalion ami a ni a, a nupui leh a fanu kum hnih mi a thihsan a ni. Karnataka-a Dharwad district-a Betadur khaw chhuak a ni a, kum 13 kalta khan sipai-ah hian a lut a ni.

Siachen Glaciers-a February 3-a vur tawhin an awmna camp a chhilh aṭanga ni ruk hnu, Thawhṭanni zan khan Hanamanthappa hi chhanchhuah hna thawktuten feet 34-a thukah an chhanchhuak a, a awmpui sipai dang pakua-te chu an thi vek a ni. Chhanchhuah a nih hnu hian Air Force thlawthheihna hmangin New Delhi-a sipai damdawi-in lam panpuiin ICU-ah dah nghal a ni a, nikhaw hreloa awmin a dinhmun a ṭha lo hle. A blood pressure a hniam nasat bakah, a thin leh kalte pawhin hna an thawk mumal thei tawh lo niin doctor-te chuan an sawi. Damdawi-in hruai thlen a nih hian intensivists, neurologist, nephrologist, endocrinologist leh surgeon-te chuan theihtawp chhuahin an enkawl nghal a, mahse a taksa a lo chhiat hman tawh em avangin an chhanchhuak zo ta lo a ni.

Siachen Glaciers hi khawvela indona hmun sang leh hautak ber a ni a, India leh Pakistan-in an sipaite dahin indona avanga thi aiin khawvawt vanga sipai thi hi an tam zawk. Kum li kalta chhung khan Siachen-a sipai dahte enkawlna atan hian cheng vaibelchhe 7,504.99 sen a ni. He hmuna sipai dah zinga 869 chu khawvawt avangin an thi tawh a ni. Siachen Glaciers-ah hian khaw vawh lam hi -45C te a tling ṭhin a ni.