Keite vangin Bengaluru-ah school 130 khar

Karnataka sorkar chuan Bengaluru-a Vibgyor Public School-a keite a luh vang leh school bul velah hmuh chhunzawm a nih avangin venthawn thilah nimin khan khawpui chhunga school 130 a khar tir.

Keite hi Thawhlehni zan dar 9.30 - 10 inkar khan Vibgyor Public School bul velah hian hmuh a ni. Mi ṭhenkhat chuan keite hi pahnih an hmuh thu an sawi.

Sorkar official-te chuan khawpui chhunga chengte chu fimkhur tura chahin, an in te ṭha taka kalh turin an ngen.

Pathianni khan Vibgyor Public School-ah hian keite hi a lut a, mi panga a hliam a ni. Forest lam thuneitute hriattir an nih hnuah keite hi damdawi-a kapin an man leh a, Bannerghatta Biological Park-ah hruai a ni. Mahse Thawhlehni zan khan school bul velah hian keite hi an hmu leh a ni.