Abu Dhabi Prince a rawn zin

Abu Dhabi Crown Prince leh United Arab Emirates armed force Deputy Supreme Commander, Sheikh Mohammed Bin Zayed Al Nahyan chu Nilaini khan ni thum cham turin a rawn zin.

Prime Minister Narendra Modi chuan Abu Dhabi Crown Prince hi a lo dawngsawng a, tun ṭum hi crown prince atana puan a nih hnua India ram a rawn tlawh ṭum thumna a ni.

Nimin khan Sheikh Mohammad Bin Zayed lawmna inkhawm hi Rashtrapati Bhavan-ah neih a ni a, he hunah hian Prime Minister Narendra Modi, Home Minister Rajnath Singh leh Finance Minister Arun Jaitley-te pawh an tel. Nimin vek khan Abu Dhabi Prince hian External Affairs Minister Sushma Swaraj a kawm a, ram pahnihte inpalai tawn dan chungchangte an sawidun a ni. Crown Prince rawn zuitu, UAE Minister of Economy, Sultan Al Mansoori chuan nimin vek khan Finance Minister Arun Jaitley a kawm bawk. Minister pahnihte hian investment, innovation, small and medium enteprise chungchangte an sawidun.

Ministry of External Affairs chuan ram pahnihte hian thawhdunna tur inremna thuthlung 16 ziah beisei a nih thu a sawi a, heng zingah hian security, counter-terrorism bakah nuclear energy lama thawhdunna tur pawh a tel.

UAE-hi insumdawn tawnna lama India thawhpui ram lian pathumna a ni a, nikum August thlaa PM Modi-an UAE a tlawh
ṭum khan ram pahnihte insumdawn tawnna hi kum nga chhungin 60% a tihlen an rel a ni. India hian UEA aṭang hian nitin crude oil barrel 270,000 a la lut ṭhin.