SC-in SC/ST Act 2018 Amendment kengkawh

Supreme Court (SC) chuan nimin khan Scheduled Castes and Scheduled Tribes (Prevention of Atrocities) Amendment Act of 2018 chu keng­kawhin, he Act hnuaia thubuai neite chu prima facie case-ah chauh anticipatory bail theih an nih thu a tichiang.

Nimin khan SC-a judge pathum, justice Arun Mishra, Vineet Saran leh Ravinda Bhat-te awmna bench chuan he SC/ST Act chungchang hi ngaihtuahin, FIR thehluh a nihah preliminary inquiry a ngaih kher lo thu leh, man dawna senior police official approval lak kher a ngaih loh thu an tichiang bawk. He Act hi Prevention of Atrocities (PoA) Act tih a ni bawk a, he dan hnuaiah hian SC leh ST-te chu tihduhdahna leh inthliarhranna lak ata venhim an nih theih nana an himna tur thu ziahlan a ni.

SC/ST Act 2018 hi Scheduled Castes and Scheduled Tribes (Pre­vention of Atrocities) Act,1989 siamṭhatna a ni a, kum 2018 March 18-a Supreme Court-in Criminal Appeal No. 416 of 2018 (Dr. Subhash Kashinath Mahajan Vs the State of Maharashtra and Another) a ngaihtuah khan he dan hi sawisel zui a ni. SC-ah hian nikum khan SC/ST Act chungchangah hian PIL thehluh a ni a, he dan hi a ṭha lo zawnga hman a nih thu PIL thehluh ah hian ziahlan a nih bakah, sorkar laipui chuan he dan hi ennawn turin SC a ngen a ni. 

1) He act hnuaia thubuai neite chu First Information Report (FIR) thehluh a nihah preliminary enquiry a ngaih kher loh thu tarlan a ni. A hma chuan preliminary enquiry hi a ngai hmasa ṭhin. 

2) He dan hnuaia thubuai neite chu investigating officer in an man dawna approval a neih kher a ngai lo a ni. A hma chuan approval nei loin he dan hnuaiah hian mi a man theih  loh. 

3) Code of Criminal Procedure, 1973 hnuaia section 438 chu SC/ST Act hnuaia thubuai neiteah a hman ve theih loh bawk. Hengte hi kum 2018 August 6 khan Lok Sabha-ah pass a nih hnuah a, Rajya Sabha-ah pass ve leh a ni.