India dodal zawnga chete kan dim lo ang : Rajnath Singh

Home Minister Rajnath Singh chuan Jawaharlal Nehru University-a India dodal zawnga che te chu na taka hrem an nih tur thu a sawi.

JNU-ah hian Kashmir zirlai ṭhenkhatten February 9 khan kum 2001-a Parliament beitu, Afzal Guru thiam loh chantir a, kum 2014-a khaihlum a nih avanga an lungawi lohna lantirin inkhawm an buatsaiha, sorkar thutlukna sawiselin thu an sawi a ni.

BJP zirlai pawl, Akhil Bharatiya Vidyarthi Parishad chuan he inkhawm huaihawt chungchang hi university thuneitute hnenah thlenin, BJP MLA Mahesh Guru pawhin police hnenah report a thehlut bawk. Delhi police-te chuan MLA report thehluh bawhzui hian thubuai an ziak lut tih sawiin, campus-a zirlaite inkhawm huaihawt lai video pawh enfiah tura an lak thu an sawi.

Home Minister chuan sorkar laipui chuan ram dodal zawnga chetna reng reng chu a ngaizam mai dawn lo tih sawiin, police-te pawh he inkhawm buatsaiha inhnamhnawihte laka action la vek tura a hriattir thu a sawi.

JNU chuan zirlaite thil huaihawt tur hi phalna an pek pawh an lakkir sak leh thu an sawi a, hetichunga an kaltlang pui luih dan chu an chhui chiang dawn tih a sawi.

Hetihlai hian Jammu and Kashmir-a inlakhran duhtu pawl hotu, Syed Ali Shah Geelani chuan JNU-a Afzal Guru leh JKLF founder Maqbool Bhat-te thlawpna lantira inkhawm huaihawttu zirlaite hrem an nih chuan J&K-ah a
ṭul anga actioan an lak ve tur thu a sawi. Geelani chuan India chu democracy ram a nih vangin mi tupawhin an duhzawng leh veizawngte sawichhuak turin dikna an nei a ni, a ti. University thuneituten Kashmir zirlaite chu an hrem a nih chuan, J&K in a tuar ve ngei dawn a, heng zawng zawnga mawhphurtu tur chu India sorkar a ni dawn a ni, a ti. Kashmir zirlaite chuan an thil phut leh duhzawngte an lantirna apiangah beih let an tawk niin a sawi bawk.