MP hlui 50 chuangin sorkar in luah man Rs vbch 1 ba

Parliament member hlui 50 chuang chu an term a zawh hnuah pawh sorkar building-ah an chen zui avanga an inluah man cheng vaibelchhe khat chuang a tling tawh a ni.

Right to Information (RTI) hmanga zawhna chhannaah he thu hi tarlan a ni a, an term zawh hnuah sorkar building-a MP khawsa zui zingah hian finance miniser hlui leh BJP hruaitu Yaswant Sinha, India cricket captain hlui Mohammed Azharuddin leh lemchan thiam Jaya Pradea-te an tel. Rajya Sabha member hlui Gireesh Kumar chuan in luah man ba cheng nuai 23 zet a nei tawh.

MP hlui 56-te chuan kum 2014 khan an awmna hmun chhuahsan mah se, an in luah man ba cheng nuai 93 tifel loin an chhuak bawk a ni.

Senior urban development (UD) ministry official-te chuan dan-in a phal chin bak sorkar building-a an khawsak chuan an in luah man hi thla khatah square meter khatah Rs 150 zel an chawi tur a ni tih an sawi. In luah man ba zui MP zinga a tam zawk hi term khat chauh lal an nih thu sawiin, "MP-te hian Lok Sabha emaw Rajya Sabha-ah emaw an chuh nawn leh dawn a nih chuan an bate an pek fel vek a ngai a ni" tiin official chuan a sawi.

In luah man ba la pe lo MP zingah hian kum 1990 chhoa mite pawh an la awm tel niin UD ministry chuan an sawi a, heng MP-te hnenah hian an ba pe tura vawi tam tak lehkha pawh an thawn thu a tarlang bawk.