State chawimawina nen Hanamanthappa vui liam

Siachen Glaciers-a vur tawlhin ni ruk zet a chhilh hnua an chhanchhuah, Indian Army-a Lance Naik Hanamanthappa Koppad chu damdawi-inah ni thum enkawl a nih hnuin Ninga≠ni khan a thi a, nimin khan Karnataka state-a an khuaah state chawimawna nen vui liam a ni.

Kum 33 mi Hanamanthappa hi ni ruk zet feet 34-a thuka vurin a chhilh hnua nungdama chhanchhuah a nih khan mak tih a hlawhin ngaihven a hlawh a, a ṭhat chhuah leh theih nan ramchhung hmun hrang hrangah an ṭawngṭai sak a ni. Mahse, vurin a taksa a lo chiah nasat tawh avangin a taksa peng hrang hrangten hna an thawk mumal tawh lo a, a harhchhuak zo ta lo a ni.

Ningani zan khan Hanamanthappa ruang hi Delhi
aṭangin special aircraft hmangin Hubballi airport panpui a nia, Karnataka Chief Minister Siddarmaiah chuan a ruang lo hmuak turin Bengaluru aṭangin Hubballi airport a pan a, mi pawimawh ṭhahnem takin an lo hmuak a ni. Hanamanthappa-a kuang hi hnam puanzar-a tuamin, nimin zing khan Nehru Ground-ah mipuiten zahna an hlan theih nan hun eng emaw chen dah a ni a, zing dar 7 vel khan an khua Betadur panpui a ni, vui a nih hma chawhma dar 11.30 thleng chu mipuite tana thlahna hun hawngin a ruang hi Betadur government high school-ah dah a ni leh bawk.

CM chuan Hanamanthappa chhungte hnenah state sorkarin ralna cheng nuai 25 a pek tur thu a sawi a, hei bakah hian thlai chin theihna ram acre hnih-a zau bakah, a chhungte zinga pakhat chu sokar hna pek a ni dawn tih a sawi bawk. State sorkar chuan Siachen-a vur tawlhin sipai a chhilh hlum pakuate zinga pahnih chu an state mi an nih thu sawiin, an chhungte hnena z·ngnadawmna ṭha tak pek an nih tur thu a puang bawk.