LeT hotuin JNU-a nawrh huaihawtte a thlawp : Rajnath Singh

Union Home Minister Rajnath Singh chuan Jawaharlal Nehru University-a zirlai nawrh huaihawtte chu Pakistan firfiak pawl, Lashkar-e-Toiba hotu Hafiz Saeed-an a thlawp a ni, a ti.

JNU-ah hian zirlai ṭhenkhatten Parliament beitu, Afzal Guru khaihlum a nih avanga an lungawi lohna lantirna hun an buatsaih a, he hun buatsaihtu puhin JNU Students' Union president Kanhaiya Kumar chu man a ni a, hei vang hian zirlaiten nawrh an huaihawt zui a ni.

Nimina chanchin thar lakhawmtute a kawmnaah Rajnath Singh chuan, "JNU-a thil thleng mek chu LeT hotu Hafiz Saeed-an a thlawp a, hei hi ram pumin a hriat a ngai. Thil vanduaithlak tak a ni" a ti.

Singh chuan JNU-a buaina thleng chu politics khelhna remchangah hmanga hruaitu dangte a puh. "Political party zawng zawng hnenah India dodal zawnga thil thleng a awm a nih chuan tumah inpuhtawn loin, lungrual takin aw kan chhuah tur a ni" a ti.

Kar kalta Inrinni khan Congress leh Left party hruaitute chuan JNU campus hi an tlawh a, zirlai pawl hruaitu Kanhaiya Kumar man a nih vanga lungawi lohna lantirte an thlawp tih an lantir a ni. Congress vice president Rahul Gandhi chuan BJP kaihhruai NDA sorkar chu zirlaite aw chhuah thei lo tura rahbeh tumah a puh.

Delhi sorkar chaun JNU buaina hi chhui chiang turin thupek a tichhuak tawh. Chief Minister Arvind Kejriwal chuan, "JNU zirlai hruaituten India dodalna thu an aupui nia sawi a ni a, hetihlai hian a titu tak chu ABVP activist-te nia sawi a ni bawk. Thu dik hriatchhuah a nih theih nan chhui chian a ni dawn a ni" a ti.

BJP zirlai pawl, ABVP chuan India dodalna thu aupuitu zingah an member an tel lo niin a sawi. ABVP hian Congress hruaitu Rahul Gandhi-an campus a tlawh hian flag dum an lo vaikhum a ni.

Kanhaiya Kumar-a chhungte chuan BJP thuthlung a duh loh vangin Kumar hi man a ni a, ram dodaltu anga puh a ni tiin an sawi. Kumar hi Communist Party of India (CPI) zirlai pawl, All India Students Federation (AISF) aṭanga JNUSU president ni thei hmasa ber a ni. Ram a hmangaih zia lantir nan RSS hriatpuina a mamawh kher lo tiin a sawi a, a thusawi tukah hian ram dodal zawnga che-ah puhin man a ni.