Tamil Nadu-ah Congress leh DMK thawkdun dawn

Kumina Assembly inthlan neihna tur, Tamil Nadu state-ah Congress party leh Dravida Munnetra Kazhagam (DMK) an thawkdun dawn.

Kar kalta Inrinni khan Congress senior leader leh Rajya Sabha-a eptu hruaitu, Ghulam Nabi Azad leh DMK hotu Karunanidhi-te chuan Chennai-ah meeting neiin, party pahnih thawhho chungchang an sawidun a ni. Meeting zawha chanchin thar lakhawmtute a kawmnaah Azad chuan, "Tamil Nadu assembly election neih turah DMK leh Congress hi an thawkdun dawn a, kan tum ber chu DMK kaihhruai sorkar din a ni" a ti.

Congress hruaitu chuan seat insem chungchang an la sawidun lo a, DMK hruaitute nen an la sawi ho leh dawn tih a sawi. Assembly inthlan neih turah party pahnih ṭangdunte chuan DMK hruaitu kaihhruaina hnuaiah an bei dawn a, DMK chuan mawhphurhna chang sang zawkin seat pawh a chang hnem zawk niin Azad chuan a sawi.

Party pahnihte hi a hmain an lo thawk dun tawh a, mahse DMK hian Congress party chu Sri Lanka-a Tamil mite ngaihthahah a puh vang te, 2G spectrum thubuai avanga DMK hruiatu leh Union Minister hlui A Raja leh Karunanidhi-a fanu, Kanimozhi te man an nih vangin kum 2013 khan an thawhdunna hi a lo titawp tawh a ni.

Tamil Nadu-ah hian Congress party hi hun rei tak chhung a che ṭha tawh lo a, Tamil Nadu assembly inthlan hnuhnung berah khan DMK nen thawkdun chungin assembly seat 234 awmah seat nga chauh a la ni. DMK nena an thawhdunna a tawp hnu, kum 2014 Lok Sabha inthlanah khan a mal din a, seat khat mah a la lo.

Congress party hian Tamil Nadu-a DMK nena thawhdunna tur an tihfel hnuah, assembly inthlan hmabak dang, West Bengal-ah pawh Communist Party of India-Marxist (CPI-M) nena thawhdun an tum a, thutlukna erawh an la siam lo.

CPI-M hruaitute hian tunkar chhungin meeting pawimawh an nei dawn a, Thawhlehni-ah Politburo meeting neiin, hemi hnu hian ni hnih chhung Central Committee an nei leh dawn a, he hunah hian Congress party nena thawhdun tur chungchangah party hotuten thutlukna an siam ang. Kar kalta khan West Bengal-a CPI-M kaihhruai Left Front chuan Congress party thawhpui hi an lo remti tawh a ni.

Tun thla tir lam kha West Bengal-a Congress hruaitute chuan an party vice president Rahul Gandhi hoa meeting neiin, an state-a rorellai Trinamool Congress nena thawhdun an duh loh thu an sawi a, hetihlai hian Left Front thawhpui chungchangah erawh a duh leh duh lo an awm. Rahul Gandhi chuan party dang thawhpui turah an party president, Sonia Gandhi chuan thutlukna a siam thuai tur thu a sawi.

West Bengal-a assembly inthlan hnuhnung berah khan Congress Party hian Mamata Banerjee-i party, Trinamool Congress nen thawkdunin, kum 34 zet thuneihna lo chang tawh CPI-M kaihhruai Left Front sorkar an paihthla a ni. Mahse Trinamool Congress-in central-a Congress kaihhruai UPA sorkar a thlawpna a tihtawp avangin kum 2012 khan West Bengal-a an thawhdunna hi an titawp a ni.