SC-in anpui inneih chungchang Parliament thuneihnaah a dah

Chief justice of India, DY Chandrachud kaihhruai judge panga awmna bench chuan nimin khan dan hnuaia anpui inneih phal tura ngenna theh luh chu a ngaihtuah. Judge-ah hian justice Sanjay Kishan Kaul, Ravindra Bhat, Hima Kohli leh PS Narasimha-te an tel. Anpui inneih phalna dan siam hi Parliament thuneihnaah an dah a ni.

Chandrachud chuan "Special Marriage Act (SMA) hi hnawl a nih chuan India hi independence hma angah khan a lut leh ang. Court hian kawng dang zawnga SMA-ah hian thu kan belh a nih chuan dan siamtu hna kan thawk dawn tihna a ni. Court hi chutiang ti tura din a ni lo," tiin a sawi.

Supreme Court hian anpui inneih phalna dan siam tura petition theh luh chungchanga a thutlukna siam hi nimin khan a puang a, an thutlukna siamah hian Special Marriage Act leh Foreign Marriage Act hmanga dan siam chin chauh an en thu sawiin, heng Act te hian anpui inneihna a pawm loh thu an sawi.

CJI chuan,"Anpui inneih phalna hi Parliament thuneihna a ni a, Parliament hian Special Marriage Act hi a duh chuan a siam ṭha thei a ni" tiin court chu dan siamtu huanga a inrawlh loh nan fimkhur a ngaih thu a sawi bawk.

Sorkar laipui hian anpui inneih hi dan hnuaia pawm a duh ngai lo a, Parliament kuta a awm thu a sawi fo a ni. Anpui inneih phalna tur petition hi May thla khan hearing neih a ni tawh bawk. Sorkar laipui hian inneihna hi mipa leh hmeichhe inkar tur a ni tih leh, anpui inkawp leh inneihna chu tunlai mi neinungte zia mai a nih thu a lo sawi tawh a ni. Hetih lai hian CJI Chandrachud chuan mi tu mah hi an it zawng danglam avanga inneihna phalsak loh an ni tur a ni lo tiin, sorkar laipui chu anpui kawpte chungchang ngaihtuah tura committee a din kawnga hma la chak turin a hrilh.