Eptu party hruaitute'n Palestinian palai hmu

India-a Palestinian palai, Adnan Abu Alhaija chu eptu party ṭhenkhatte nen inkawmin, Israel leh Hamas indona avanga Palestinian mipuite tawrhna chu pawi an tih thu leh an tawrhpui thu an sawi a, India pawh a theih anga inrawlh a, inkahhai puang tura nawr tura an duh thu an sawi bawk.

Palestinian palai nena inkawmna hun hmanga eptu party hruaitu kal zingah hian CPI general secretary, D. Raja te, CPI(ML) general secretary, Dipankar Bhattacharya te, JD(U) leader, KC Tyagi, Samajwadi PArty leader, Javed Ali Khan, CPI(M) Polit Bureau member, Nilotpol Basu leh Congress leader, Mani Shankar Aiyar te an tel.

Eptu party kal khawmte hian Gaza-a Palestinian mite Israel-in bomb hmanga a bei chu an dem thu sawiin, Gaza mipuite tana ṭanpuina leh chhawmdawlna a rang thei ang bera pek a ṭul thu an sawi. Meeting-ah hian resolution siamin,"Tharum thawhna chuan engmah a ching fel ngai lo a, chhiatna leh tawrhna tawp thei lo thlentu mai a ni," an ti. "Khawvel ram zawng zawngte hian Israel hnenah hian international law zawm tur leh Palestinian mipuite zahna lantir a, an dikna chanvo neihte chhuhsak lo turin an nawr tur a ni. Helai hmuna remna tluantling zawk a awm theih nan hian nasa zawka inbiakna nei tur leh ram dangte inrawlh tam turin kan ngen duh bawk a ni," tiin khawvel ram dang inrawlh tura an phut thu an sawi.