Journalist-te'n an zalenna humhim nan President inrawlh turin an ngen

Press mite zalenna rahbeh tuma beih a nih avangin journalist ṭhahnem tak Press Club of India-ah lungawi lohna lantirin an kal khawm. Miin a duhzawng a sawi theihna, a duhzawng hna a thawh leh eizawn nana a hman phalna constitution-in a pek chu humhim a nih theih nan President Droupadi Murmu chu inrawlh turin lehkha thawnin an ngen.

Journalist-te chuan ram chhunga mahni inenkawla ding media te chuan beih an tawh thu hi President hnena an lehkha thawnah hian an ziak."Journalist kan nih angin kum 75 chhunga kan ramin a lo thlen tawh leh kal tawhna chinah hian kan inchhuang hle ṭhin. Kan ram democracy tiderthawng leh, tawn leh kan duh loh hun thim pawh kan tawng tawh a ni. Vawiinah pawh kan ram hian khatiang hun thim ang tak, a aia hlauhawm zawk hi a tawng leh mek a ni. Journalist tam takin an hnathawh tiharsa tur thil an tawh lai ngeiin journalist-te laka dan hriam leh khauh tak tak hman erawh a pung nasa hle thung a ni," tiin Press Club of India chuan an tarlang.

Lehkhaah hian journalist-te nek chep zawnga dan hriam tak tak an siam hian he rama mipui tam takte ngaihdan an rap bet tel tih sawi langin,"Tuna dan mumal lo leh hlauhawm tak an siam hmang hian thuneitute chuan an thuneihna hmangin eizawnna atana kan hman kan phone, laptop leh hard disk thlengin min hrensak a ni," tiin, dan hman lai chuan independent press te a nek chep bik thu an sawi. Thawhṭanni khan Joint platform of Central Trade Unions leh Samyukt Kisan Morcha te chuan journalist-te'n beih an tawk leh man an nih chungchangah demna thuchhuah an lo siam tawh bawk a ni.