Central University dangten JNU zirlaite thlawp

Jawaharlal Nehru University (JNU)-a Students' Union president Kanhaiya Kumar man a nih avanga zirlaiten nawrh an huaihawt chu Pune-a Film and Television Institute of India (FTII) leh central university dang 40-te chuan an thlawp thu an sawi.

Federation of Central University Teachers Association (FEDCUTA) President Nandita Narain chuan sorkar laka hela puha JNUSU president man a nih vanga JNU zirlai leh zirtirituten nawrh an huaihawt chu central university 40-a zirtirtute chuan an thlawp tih a sawi. JNU teacher association pawhin Pathianni-a zirlaiten nawrh an huaihawtnaah an thlawpna lantirin an telpui a ni.

February 9 khan JNU campus-ah hian zirlai ṭhenkhatten inkhawm buatsaihin, kum 2013-a khaihlum Parliament beitu Afzal Guru tihhlum a nih avanga sorkar an demna thu te an aupui a ni. He inkhawmah hian JNUSU president Kanhaiya Kumar hi a tel ve nia puhin kar kalta Zirtawpni khan India dodal zawnga chea puhin man a ni.

BJP zirlai pawl, Akhil Bharatiya Vidyarthi Parishad (ABVP) chuan Afzal Guru tihhlum a nih chungchang dem a zirlai kalkhawmte chu India dodaltu nia puhin police hnenah complain an thehlut a, hei hi BJP kaihhruai NDA chuan a lo thlawp nghal bawk. Union Minister Rajnath Singh leh Smriti Irani-ten JNU campus-a zirlaite inkhawm buatsaih chu an dem thu an sawi hnuah, police-te chu campus-ah hian kalin, Afzal Guru puala inkhawm buatsaiha tel nia sawite chu an zawng nghal a ni.

Union Home Minister Rajnath Singh chuan JNU-a zirlai nawrh huaihawtte chu Pakistan firfiak Hafiz Saeed-an a thlawp niin Pathian≠ni khan a sawi a, hei hian politics lama inbeihna a tihchhuah phah.

CPM hruaitu Sitaram Yechury chuan Home Minister chu thu phuahchawp saw mai lo turin a ti a, CPI hruaitu D Raja pawhin minister thusawi chu chhuichian a phut bawk.

Eptu pawl hrang hrangte chuan JNU zirlai pawl hruaitu man a ni chu an dem thu an sawi a, sorkar laipui chu university thuneihnaah inrawlhah an puh bawk. Eptu pawlte chuan BJP zirlai pawl, ABVP chu zirna in hrang hrangah inlulingah puhin, an duhdan kalha chete hrem turin sorkar laipui pawh an inrawlh phah ṭhin niin an puh. Hyderbad University-a zirlai hrem, a hnua intihlum ta pawh hrem a nih chhan pawh ABVP hruaitu kutthlaka puh a nih vang nia sawiin, hrem a nih theihna atan union minister-te pawh an inrawlh a ni, a ti.

JNU Vice Chancellor Jadesh Kumar chuan zirlaite chu nawrh huaihawt lo tur leh, university zirna tibuai zawnga che lo turin a ngen. VC chuan, "Mitinin an ngaihdan tlangau pui tura zalenna an neih chu kan thlawp a, boruak ṭha tak hnuaia kan buaina tawh mek hi chinfel theih a nih avangin nawrh huaihawt kher hi ṭha kan ti lo a ni. Zirna hi a pawimawh ber a, hemi tibuai zawnga che lo turin kan ngen a ni" a ti.

Hetihlai hian JNU teachers association chuan VC-in campus chhunga police-te luh a phalsak chungchang an zawhnaah, VC chuan amahin kal tura a sawm a nih loh thu a sawi a, mahse danin a phut anga an tih a ngaih thu a sawi.

CPI(M) general secretary Sitaram Yechury chuan JNU zirlai nawrh huaihawtte a thlawpna a lantir avangin phone hmanga vauna a dawn thu a sawi. New Delhi DCP Jatin Narwal chuan CPI(M) hotu hnen aṭang hian complain an dawn tawh thu a sawi a, mahse thubuai erawh an la ziak lut lo. CPI (M) chuan Pathianni zan dar 10.30 leh dar khat inkar khan an party hotu office chu ṭum thum telephone-a rawn biain, JNU zirlaite a thlawpna a lantir chu thil dik lo a nih thu leh, a chhunzawm zel chuan amah ngeiin a la tawrh tur thu an rawn sawi a ni, a ti. Pathianni zan vek khan mi ṭhenkhatin CPI(M) office hi beih a tum bawk a, police-ten an zinga pathum chu an man a ni. An mi mante hian AAP member niin an insawi a, mahse AAP chuan an party member an nih loh thu leh, RSS mi leh sa an nih thu a sawi thung.