Covid-19 kai hmuh chhuah thar mi 6,767 an awm
Coronavirus hripui lengin ziaawm lam a pan thei lo a, ni thum chhung chu India ramah a zawnin hri kai hmuh chhuah 6,000 an tling tawh.
Nimina Ministry of Health and Family welfare-in report a tihchhuahah chuan kai hmuh chhuah thar 6,767 an awm a, ni khata kai thar hmuh chhuah tam ber record a ni leh tawh. Kai thar hmuh chhuah tam ber ni hi ṭum eng emaw zat a thleng tawh a ni.
India ram pumah hri kai 1,31,868 an awm tling tawh a, ziaawm lam a pan thei lo a, a ni telin kai thar an pung zel a ni. Tunah hian hri kai mek 73,560 awm tawhin damchhuak hi 54,441 an awm tawh a, thihpui 3,867 an awm tawh.
Health Ministry report tihchhuah aṭanga darkar 24 hmalamah hian enkawl dam mi 2,657 an awm a, thi 147 an awm bawk.
Maharashtra chu kai thar tamna ber state an ni chho zel a, MoHFW report tihchhuahah hian ni khat chhung ringawtin kai thar 2,608 an awm a, hri kai hmuh tawh zat hi 47,190 an awm tawh a ni. Maharashtra-ah hian enkawl dam pawh an tam tawh hle a, 13,404 chu enkawl dam leh tawh niin report tihchhuah hma darkar 24 chhung hian mi 821 enkawl dam an nih laiiin thi 60 an awm belh a ni.
Tamil Nadu pawhin hma an sawn thei lo a, kai thar 759 awmin thi panga an awm bawk a, hri kai hmuh tawh zat hi mi 15,512 an tling tawh. Gujarat-ah chuan kai thar 396 an awm a thi 27 awmin, Delhi-ah chuan kai thar 591 an awm a, thi 23 an awm bawk.
Hri kai tam zualnate chu Gujarat (13664), Delhi (12910), Madhya Pradesh (6371), Rajasthan (6742) leh Uttar Pradesh (6017) te an ni.