Domestic flight thlawh tir tum State ṭhenkhatin thlawp lo

Ram puma lockdown kalpui avanga hun rei tak ram pawn leh ram chhunga thlawhtheihna service tihtawp a nih hnuah, vawiin aṭangin ram chhung bikah thlawhtheihnate an thlawh phalsak ṭan a ni. Mahse hei hi state ṭhenkhat, airport lunna hmuna amite chuan an thlawp lo hle thung. 

Maharashtra sorkar chuan May 10-a lockdown rules an siam chu siam danglam a la ni lo tih sawiin, he rules hnuaiah hian a bik taka phalna pek chauh thlawh tir phal a la ni, a ti. Maharastra home minister Anik Deshmuk chuan an state chu Covid-19 kai tamna ber a ni a, hmun dang aṭanga mi tam tak an luh belh chu an la duh lo hle a, red zone huam chhunga airport hawn tir an ni tur chu thil ṭha lo tak nia a ngaih thu a sawi. 

Covid-19 kai tamna state pahnihna, Tamil Nadu pawhin Civil Aviation ministry hnenah airport hawn hun tur chu May 31-ah sawn turin a ngen tawh bawk.

 

West Bengal chuan an state-in cyclone Amphan vanga chhiatna nasa tak a tawh mek avangin, Kolkata-a thlawhtheihna thlawh luh tir tum chu May 30 thleng atan titawp rih turin a ngen. CM Mamata Banerjee chuan sorkar laipuiin thlawhtheihna service luih a tum a nih pawhin Kolkata-ah ṭum tir loin, North Bengal-a Bagdogra airport-a ṭum tir zawk turin a ngen dawn tih a sawi bawk.