Sorkar laka hela puhin DU lecturer hlui man

Jawarharlal Nehru University (JNU), Delhi-a sorkar laka lungawi lohna lantir avanga buaina kal zelah Delhi University-a lecturer hlui, SAR Geelani chu sorkar laka hela puhin nimin zing khan man a ni.

Thawhṭanni zan khan Geelani hi police station-ah koin thu zawhfiah a ni a, hun rei tak thu an zawh hnuin nimin zing dar 3 vel khan an man. Man a nih hnu hian a hriselna dinhmun enfiah turin RML Hospital-ah hruai a ni.

February 9 khan JNU campus zirlai ṭhenkhatte Parliament beitu,Afzal Guru khaihhlum a nih dana lungawi lohna lantirin zirlaiten sorkar sawiselna thute an aupui a, he thil buatsaihnaah hian JNU students' union president Kanhaiya Kumar a inhnamhnawih nia puhin, BJP MP Mahiesh Girri leh BJP zirlai pawl, ABVP ten complaint an theh≠luh hnuah JNUSU president hi police ten a man a, hei hi duhloin university zirlaite chuan campus-ah nawrh an huaihawt zui nghal bawk.

February 19 khan Press Club-ah mi ṭhenkhatin hun hmangin, Afzal Guru an thlawp thute an aupui leh a ni. He hunah hian Geelani hi a tel ve avangin police-te chuan Geelani leh midang pahnihte lakah hian February 12 khan thubuai an ziak lut. Police-te chuan Geelani-a hi Press Club-a hun hman huaihawttu ber a ni tih an sawi a, "Press Club hmanna tur hi Geelani hian e-mail hmangin a book a, vantlang inkhawm buatsaihna tur niin sawi mah se chutiang atan an hman lo a ni" an ti. FIR ziahluh anih hnu hian police-te chuan DU professor Ali Javed pawh thu an zawt bawk.

Kum 2001 khan Delhi Police-te chuan Parliament beih kaihhnawih thilah Geelani hi an lo man tawh a, mahse Delhi Court chuan kum 2003 October thla khan finfiahna awm
ṭha tawk lo nia sawiin a thubuai hi a titawp a, hei hi Supreme Court pawhin kum 2005 August thla khan a pawmsak ve leh bawk a ni.

Delhi Police-te chuan Thawhṭanni-a JNUSU President Kumar-a Patiala High Court-a hruai a nih ṭuma JNU zirlai leh zirtirtuten lungawi lohna an lantir chungchanga thubuai pahnih an ziak lut bawk. DCP (New Dehi ) Jatin Narwal chuan New Delhi district-a police station pathumah complaint eng emaw zat a luh thu a sawi.

JNUSU hruaitu chungthu ngaihtuahna hmun, Patiala Court-ah hian amah ṭawiawmin JNU zirlai leh zirtirtu
ṭhahnem tak an kal a, court complex an thlen hian lawyer rualte hian zirlai pungkhawmte leh media mite chu lo dangin an lo tibuai a ni. Nimin khan journalist-te chuan lawyer-ten media mite kut an thlak avanga an lungawi loh thu an chhuah.

He thil thlen hnu hian Delhi High Court-ah JNU campus-a buaina thleng chu Delhi Police-ten an chhui ṭha tawk lo nia sawiin, National Investigation Agency (NIA) chhui tir turin petition thehluh a ni. Mahse Delhi Court chuan petition thehluh hi a hnawl a, NIA chhui ngai khawp thil a nih loh thu leh, Delhi Police-ten ṭha taka an chhui mek thu a tarlang.

JNU campus-a buaina chhuak hi BJP leh Congress party chuan inbeihna remchangah an hmang zui bawk. BJP president Amit Shah chuan JNU zirlai hruaitu man anih vanga zirlai lungawi lohna lantirte a thlawp vangin Congress vice-president Rahul Gandhi chu ram dodaltute thlawpah a puh a, Congress president Sonia Gandhi pawh a ngaihdan chiang taka tarlang turin a phut bawk.

Congress party chuan Amit Shah hi rang taka chhangin, Supreme Court-in a hnawhchhuah hial tawhte chuan ram hmangaih chungchang an hrilh a ngai lo tih sawiin, Congress party chu ramin zalenna a hmuh theihna atana a sulsutu a ni, a ti. Congress thupuangtu, Randeep Surjewala chuan JNU-a buaina thleng chu Modi-a sorkarin phiarrukna a kalpui dan leh an party thuthlung zawm lote a ngaihtheih lohzia lantirtu a ni, a ti.

Congress hruaitu leh union minister hlui, Shashi Tharoor pawhin sorkar laipui chu university inrelbawlnaa inrawlh vak lo tura a duh thu sawiin, zirna-in te chu anmahni inrelbawl tir tur a ni, a ti. Tunhnaia Hyderabad University leh JNU-a thil thleng chu pawi a tih thu sawiin, zirlaiten zalen taka an duhzawng leh an duh loh zawng an sawichhuah theihna rama India siam chu an duh niin a sawi. Tharoor chuan, ngaihdan in ang lo neihte pawh democracy hlutna tizualtu a ni a, heng mite hi an ngaihdan angte an puanchhuah phalsak an ni tur a ni, tiin a sawi.

Ram hrang hrang university-a mithiam rual 400 chuang chuan thuchhuah inṭawm siamin, JNU-a zirlai hruaitu man a nih dan chu an dem thu leh, zirlai nawrh huaihawt mekte an thlawp thu an sawi. Thuchhuah siamtu zingah hian khawvel huapa lar, Columbia, Yale, Harvard leh Cambridge university mithiamte pawh an tel a ni. An thuchhuahah hian JNU campus-a thil thleng chu khawvel ram hrang hranga zirlai, zirtirtu leh mithiamten an ngaihven reng thu sawiin, dik lo taka zirlai hruaitu hren a ni leh lungawi lohna lantirtu zirlaite chunga inluling taka sorkar chetdan chu an dem tih an sawi a ni.