PM hoin all party meeting nei

Parliament budget session neih tur tluang taka neih a nih theih nan nimin khan Prime Minister Narendra Modi chuan political party hrang hrang hruaitute chu meeting a neihpui.

Parliament session hnuhnung pahnihah khan eptuten Modi-a kaihhruai sorkar laipui chu thil dik tawk lo awmna, Lalit Modi leh Vyapam buaina bakah thil dangahte hma la tura phutin rorel mumal thei loin inkhawm an aubuai a ni. Hei vang hian budget session neih tur hi boruak
ṭha taka hnuaia kalpui a nih theih nan PM hian eptu hruaitute a kawm a ni. Budget session hi tun thla ni 23 aṭang hian neih a ni ang.

Kum 2014-a BJP kaihhruai NDA sorkar lakluh a nih hnuah tun ṭum hi Prime Minister-in eptu pawl hruaitu hrang hrangte meeting a neihpuina hmasa ber a ni.

Nimina all party meeting-ah hian budget session neih tur thlir lawk a nih rualin, tunlaia buaipui mek, Jawaharlal Nehru University (JNU)-a zirlai pawl hruaitu man a nih avanga buaina thleng mek chungchang an sawi≠chhuak. Eptu hruaitute chuan ram dodal zawnga chetna an do tlat thu an sawi rualin, JNU zirlai pawl hruaitu man a nih dan te, police-ten campus chhung an luhchilh danah sorkar chu a nihphung pela cheah an puh.

Eptute chuan JNU campus-a thil thleng chu sorkar laipuiin a kalphung duh lote nuaichhiat tuma a chet lakna pakhat niin an puh a, mahse sorkar chuan hei hi a pha thung.