Climate change chungchang sawiho tur Inter-Ministerial group din

Sorkar laipui chuan khawvel huapa climate change chungchang sawihona neih a nih huna India thlirna leh dinna tur ngaihtuah turin inter-ministerial group a din. He group hian sik leh sa chungchangah thil panga; greenhouse gas tihchhuah tlemna tur, sik leh sa inthlaka insiam rem dan tur, chhiatna leh harsatna tawk ṭanpuina, sik leh sa siam ṭhat nana sum dah, leh Paris agreement-a Article 6 chungchangte an ngaihtuah dawn a ni.

Inter-Ministerial group-ah hian Ministry of Environment, Forests and Chilmate Change, Ministry of Power, Ministry of New and Renewable Enerygy leh Department of Economic Affairs te an tel. An thu ngaihtuah tur pangate hi kimchang zawka ngaihtuah turin pakhat zel atan sub-group panga an din leh chhawng a, heng sub-group-ahte hian joint secretary level chin official paruk zel an awm.

Chhiatna leh harsatna ṭanpuina tur bik hi nikum, Egypt-a COP27 neih zawh takah khan pawm a ni a, sik leh sa inthlakin a nghawng nat zual ram ṭhang lai mekte tana ṭanpuina pek chu a tum ber a ni. Kumin December thlaa COP28 neih turah hian hemi chungchang hi sawi leh tur a ni a, tuin nge tu hnenah nge he ṭanpuina hi pe ang a, eng chin nge huamtir a nih dawn tihte an sawi ang. Sik leh sa siam ṭhat nana sum dah chungchang hi chu inter-ministerial group hian Standing Committee on Finance (SCF) kutah dah an tum nia hriat a ni.

Paris agreement-a article 6 hi Paris Agreement goal-a ram tinte'n boruak bawlhhlawh an tihchhuah tam zawng titlem tura ram dang nena an duh thua thawhhona an siam theihna a ni a, ram pakhatin greenhouse gas a tihtlem avanga boruak tibawlhhlawhtu dang tihchhuah theihna a neih, carbon credit chu ram dang ṭanpuina atan a hmang thei a ni.