MP inthlan tur atan Congress-in manifesto tichhuak

Madhya Pradesh-a state assembly inthlan lo awm tur atana Congress party manifesto chu tihchhuah a ni a, manifesto an siam hi phek 106-a chhah niin, thutiam 1,290 zet an nei. Congress-in a thil tiam zingah hian sorkar hna post nuai 2 awl chu hnawh khah leh thingtlang khuate tana sorkar hna post nuai 1 siam belhte a tel a ni.

Manifesto-ah hian paddy quintal khat Rs. 2,500 zela laksakna tur leh chhangphut buh (Wheat) quintal khat Rs. 2,600-a leisakna turte a tel a, sorkar chuan loneitute'n quintal khat zela Rs. 3,000 an lak theihna tur kawng a zawng dawn a ni, tiin an tarlang. Nandini Gau Dhan Yojana hnuaiah bawng ek chu kg 1 Rs. 2/- zela leisak tum a ni bawk a, Yuva Swabhiman Yojana hnuaiah ṭhalai eizawnna nei lote chu thla tin Rs. 1,500 aṭanga Rs. 3,000 pek an nih tur thu an tarlang tel bawk. An scheme neih tur zingah Beti Vivah Yojana chuan hmeichhe fate tan Rs. nuai 1.01 an dah tur thu an sawi a, Meri beti Ladli Yojana kaltlanga hmeichhe fate tan vek Rs. nuai 2.51 an tiam bawk.

Social security pension chu thla tin atan Rs. 1,200-a tihsan an tum thu sawiin, sorkar hnathawkte tan hna kaisan leh hlawh pun an tiam bawk. Madhya Pradesh-in anmahni puala IPL team neih bakah infiamna chawikan nan Padak Lao scheme an neih tur thu an tarlang tel bawk a ni. Congress hian Madhya Pradesh mipuite tan dikna chanvo pakua pek an tiam a, chungte chu; tui, hriselna, eng, zirna, in leh lo, hlawh tlem lam bituk, hna pek leh rorelna dik te an ni. Heng atan hian health insurance Rs. nuai 25 pek leh chhungkaw tin tan accident avanga chhiat tawh thilah Rs. nuai 10 an tiam a ni.