Pakistan silai kah avangin BSF sipai pahnihin hliam tuar

Jammu-a Arnia sector-ah Pakistan Rangers chuan inkahhaina dan bawhchhiain silai an hmet puak a, ramria duty Border Security Force (BSF) mi leh sa pahnihin hliam an tuar tih BSF chuan an sawi.

BSF chuan Pakistan Rangers hian Arnia sector Vikram post-a sipai awmte chu an rawn kah thu sawiin, BSF pawh hian an kap let ve nghal niin an sawi a, February 2021-a inkahhai puan hnua silai hmeh puah leh hmasak ber a nih thu an sawi bawk. BSF mi inhliamte hi Government Medical College Hospital-ah dah an ni a, doctor-te chuan an dinhmun a ṭhat thu an sawi.

India leh Pakistan hian February 25, 2021 khan Jammu and Kashmir-a Line of Control (LoC) leh sector eng emaw zatah inkahhai puanna thuthlung an ziak a, mahse, Pakistan Rangers te hian Thawhlehni zan khan inrin lawkna pawh awm loin Arnia sector-a BSF duty-te hi an kah thu leh BSF pawhin an kah let ve nghal thu BSF thuchhuah chuan an tarlang. Thawhlehni khan BSF te hian Punjab-a Tarn Taran district-ah Pakistan aṭanga India kal tum, ramri kan ru an mlo man tawh bawk. Ramri kan tum hi thu an zawh fiahna aṭang chuan Pakistan mi a ni a, thil hlauhawm emaw rinhlelh tur a awm loh thu leh, ramri kan tum satliah nia an ngaih thu an sawi. BSF hian Pakistan Rangers-te hi an awmna hmunah kal chilhin, an chet dan chu an dem thu an hrilh tawh a ni.