Home Ministry official-ten JNUSU hotu thlavang hauh
Home Affairs Ministry-a official-te chuan Delhi Police-ten an man, Jawaharlal Nehru University (JNU) Students Union (JNUSU) president, Kanhaiya Kumar chuan India dodal zawngin thu a sawi lo nia a lan thu an sawi.
Kanhaiya Kumar hi university campus-ah India dodalna aupui a, sorkar laka hel anga puhin Delhi Police-te chuan an man a ni. Kumar man a nih vang hian JNU zirlaite chuan lungawi lohna lantirin an buai phah hle a ni.
MHA official-te chuan sorkar laka hel anga Kumar an puh chungchangah Delhi Police-te chu thil hrechiang hmasa loa che chak lutuka an ngaih thu an sawi.
Thawhlehni khan security agency-te chuan JNU campus-a thil thleng chungchang an zirchianna chu MHA official-te hi an hrilh a ni. Campus chhunga Parliament beitu, Afzal Guru khaihlum anih chama amah hriatrengna hun buatsaihah Kumar hi tel mah se, India dodal zawng emaw, sorkar laka hela puh theihna tura zawngin eng thu mah a sawi lo a ni, an ti.
Kanhaiya Kumar pawh hian campus-a hun buatsaihah hian India dodal zawngin eng thu mah a sawi lo a, mahse Prime Minister Narendra Modi leh RSS erawh chu a sawisel tih a phat lo thu a sawi.
Ferbuary 3-a JNU campus-a Afzal Guru puala hun buatsaihtute hi CPI (Maoist) zirlai pawl, Democratic Students Union (DSU) nia hriat a ni a, Kumar-a chu CPI zirlai pawl, AISF member a ni thung. Hei bakah he hun buatsaiha tel tura sawmna poster siamah pawh DSU hruaitute hming chauh tarlan a ni bawk.
Eptute chuan JNUSU president hi BJP MP Mahesh Girri leh BJP zirlai pawl, ABVP te complaint avanga sorkar laka hel leh ram dodal zawnga chea puhin Delhi Police-ten an man niin an sawi. BJP leh ABVP chu an thuthlung ang chauha thil kalpui tum leh, an duhdan kalha che te lakah inlulingah an puh.
BJP hruaitu Shatrughan Sinha pawhin Kanhaiya Kumar laka thubuai siamsak chu tihtawp leh, chhuah nghal tura a phut thu a sawi. BJP hruaitu chuan, "JNUSU president thu sawi ka hriat hnuah, ram dodal zawng emaw, ram danpui kalh zawng emawin eng thu mah a sawi lo a ni" a ti. JNU chuan khawvel huap pawha zirna in ṭha ti a hriat a nih avangin an buaina tawh mek chu tawp thuai se a duh thu a sawi bawk.
JNUSU hruaitu man anih chungchanga buaina kal zelah, Thawhlehni zan khan Delhi Police officer eng emaw zat chu transfer an ni. Thawhṭanni-a Patiala House Court-a Kumar-a chungthu ngaihtuah a nih ṭuma amah ṭawiawma kal, JNU zirlai leh zirtirtute kut thlak an nih chugnchanga Supreme Court-a petition thehluh pawh ngaituah a ni ang.
JNU Vice Chancellor M Jagadesh Kumar chuan political party hrang hrangte chu an university buainaah inrawlh lo tur leh, university thuneitute chinfel tura dah turin a ngen. VC chuan campus chhung leh pawn lamah lungawi lohna lantir chhunzawm la ni mah se, nimin aṭang khan pangngai taka class kalpui a nih thu a sawi.
Thawhṭanni-a Patiala House Court-ah an kal ṭum khan lawyer rualte chuan zirlai leh zirtirtute hi lo dangin kut an lo thlak a, journalist eng emaw zat pawh kut an thlak tel bawk. He thil thleng vang hian Thawhlehni khan journalist-te chuan Home Minister Rajnath Singh hmuin, court-a police awmte chuan lawyer hoin zirlaite leh reporter-te kut an thlak lai chuan lo dan tumin engmah an ti lo tih an sawi. Kut thlaktu lawyer-te chungah darkar 48 chhunga action la ngei tura an phutna pawh Supreme Court-ah an thehlut bawk.
Nimin khan Patiala House-ah Kumar-a hi hruai leh a ni a, a hma ang bawkin court pawn lamah lawyer ṭhenkhat chuan zirlai leh journalist kal khawmte chu kut an lo thlak leh a, hei vang hian venhim hna thawk turin security force pawh dahbelh nghal a ni. Zirlaite kut thlaktu lawyer-te hian JNU an duh loh thu leh, he zirna hi hi khar tura an phutna thute an lo aupui. Hetihlai hian lawyer pawl dangte chuan Kumar-a hi chhuah turin an phut thung.
Thawhlehni zan khan Kolkata-a Jadavpur University-ah Afzal Guru chawimawina kawngzawh buatsaih a ni leh bawk a, kawngzawhnaa telte hian kum 2001-a Parliament beitu, 2013-a khaihlum tak Afzal Guru-a ui thute sawiin, India lak aṭanga Kashmir indan an duh thute an aupui bawk. Nimin khan Union Home Ministry chuan Jadavpur University-a thil thleng chungchang report hi thehlut turin West Bengal sorkar a hriattir nghal a ni.