Delhi CM-in BJP MP hrem turin PM phut

Delhi Chief Minister Arvind Kejriwal-a chuan Prime Minister Narendra Modi-a hnenah lehkha thawnin, Jawaharlal Nehru University (JNU) buaina kaihhnawiha man te chu chhuah tura a phut bakah, he university hi 'firfiakte hmunpui' tia sawi chu thu dik lo hulhual a nih thu a sawi.

Kejriwal hian Thawhlehni khan PM hi lehkha a thawn a, hemi ni vek hian Union Home Minister Rajnath Singh pawh hmuin, JNU chungchang dik lo taka sawitu BJP MP OP Sharma leh Patiala House court pawn lama zirlaite leh journalist-te kut thlaktute chu man nghal tura a phut thu a sawi bawk.

PM hnena lehkha a thawnah, Delhi CM chuan, "Thu dik tawk lo hmanga zirna inte puh hi thil ṭha lo tak a ni a, JNU-a buaina thleng mek avanga he zirna in firfiakte hmunpui tia lantir a ni thil hlaulhawm tak a ni" tiin, buaina thleng mek chungchangah PM chu ngawi reng lo a, ṭawng chhuak tawh turin a phut tih a sawi.

Delhi CM chuan, "He buaina hi a darh zau zel loh nana hma la turin kutsuihin ka ngen che a ni. Mipuite chuan nghakhlel takin i ṭawngchhuah hun an nghak a ni" a ti. Hemirual hian JNU leh zirna in danga buaina a thlena political party-te inrawlh ṭhin chu ṭha a tih loh thu a sawi bawk.