Sorkar laipuiin rabi crop atan MSP tisang

Cabinet Committee on Economic Affairs (CCEA) chuan financial year 2024-2025 atan thlasik thlai (Rabi crop) kan tihte tana Minimum Support Price (MSP) chu a tisang.

Union agriculture minister Narendra Singh Tomar chuan sorkar laipui hmalakna chuan loneitute tana hlawkna nasa tak a thlen thu sawiin, MSP chu loneitute'n an sum leh tha sen aia tam daiha tihsan a nih thu a sawi.

MSP tihsanah hian danglam nasa ber chu lentils niin, quintal khat Rs. 425-ah tisangin Rs. 6,425 a ni tawh dawn a, rapeseed leh mustard te'n dawtin, Rs. 200-a tisangin quintal khat Rs. 5,650 a ni tawh dawn a ni. Barley MSP chu Rs. 1,850 ni tawhin, gram chu Rs. 5,440 a ni tawh bawk ang. Rabi crop zinga loneitute'n an chin nasat ber chhangphut buh (Wheat) kan tih, MSP chu Rs 150-a tisangin, quintal khat Rs. 2,275 a ni tawh dawn a ni. Food Corporation of India (FCI) hian Madhya Pradesh leh Rajasthan-a chhangphut buh ching ṭhin district 12 vel aṭangin chhangphut buh hi a leisak ṭhin.

Hetih lai hian loneitu intel khawmte chuan MSP tihsanna chu beitham an tih thu leh, MSP thar chuan an hun, sum leh tha an sen pawh a pe let pha lo niin an sawi. All India Kisan Sabha hruaitu, Amra Ram, Rajasthan-a mi chuan,"Thlai enkawl nana kan hman fertilizer leh diesel man a pung a, MSP tihsanna hi a beitham ṭhin em avangin kan thar chhuah pawh a tlem ve zel bawk. Sorkar laipui hian Swaminathan Committee report rawtna ang hi kalpui se kan duh ber," tiin a sawi. Bharatiya Kisan Union coordinator, Pavel Kussa pawhin MSP tihsanna chu a tam tawk loh thu sawiin,"Khawiah nge sorkarin kan thlai tharte a lak/lei chu? Leisak kan nih si loh chuan MSP hian awmzia a nei lo a ni. Hetianga thu an puana engmah an tih leh si loh a, mimalin kan thlaite min leisak leh si hian kawng ro a su lo a ni," tiin a sawi ve bawk.