AAP-in Chhath avangin Chhattisgarh inthlan hun sawn turin ngen

Aam Admi Party (AAP) chuan Election Commission of India (ECI) hnenah lehkha thawnin, Chhath puja festival lo awm tur avangin Chhattisgarh-a inthlan ni sawn turin an ngen. AAP hian Chhattisgarh-a Phase 2 inthlan ni tura ruat November 17 chu November 25-a sawn turin an ngen a ni.

Chhattisgarh-a AAP in-charge, Sanjeev Jha chuan,"India rama mihring tam tak, a bikin hmar lam mite hi Chhattisgarh-a cheng an tam tih kan hre vek. India hmar lama festival lian ber pawl, Chhath puja hi November 17,18, leh 19 te hian lawm a ni dawn, hetih hunah hian mi tam tak festival hmang turin mahni in lamah an haw dawn a, hei vang hian vote thlak an tlem phah thei a ni. Election Commission hnenah hemi chungchang hi inthlan an puan tuk khan kan thlen nghal a, party dang, BJP leh Congress pawhin inthlan ni sawn hi an duh thu an sawi ve tawh bawk. Vote tla a tam theih nan inthlan hun sawn hi ṭha kan ti a ni," tiin a sawi.

AAP hian Chhattisgarh assembly inthlan hi chuh turin an inbuatsaih mek a, candidate turte pawh an puang tawh a ni. Chhattisgarh-ah hian assembly seat 90 awmin inthlan hi thawh hniha neih tura ruahman a ni. A thawh khatnaah November 7-ah, seat 20 atana vote thlak a ni dawn a, a thawh hnihna hi November 17-ah neih tur niin, seat 70 atan vote thlak a ni ang. Kum 2018 inthlanah khan Congress-in seat 68 lain sorkarna an siam a ni.