High Court pariat atana judge 17 ruatna tichhuak

Supreme Court-in High Court judge ruat leh transfer chungchanga sorkar laipui a che muang chu a lawm loh thu a sawi chhuah hnuah, sorkar laipui chuan ram chhunga High Court pariata judge 17 ruatna leh High Court dang eng emaw zata judge 16 sawn kualna a tichhuak. High Court judge ruat leh sawn zingah hian Manipur High Court Chief Justice MV Muralidharan pawh telin, Calcutta High Court-a sawn a ni.

High Court judge atana ruat thar zinga 11 te hi judicial officer an ni a, a dang parukte hi advocate ni lai an ni. Supreme Court collegium hian advocate 13-te High Court judge atana rawtna hi Nilaini khan a lo siam tawh a; Gauhati High Court judge atan advocate - N. Unni Krishnan Nair leh Kaushik Goswami te rawt niin, Uttarakhand High Court judge atan advocate - Siddhartha Sah leh Alok Mahra te an rawt bawk. Advocate - Harmeet Singh Grewal, Deepinder Singh Nalwa, Sumeet Goel, Sudeepti Sharma leh Kirti Singh te chu Punjab leh Haryana High Court judge atana rawt an ni bawk a, advocate - Vinay Saraf, Vivek Jain, Ashish Shroti, leh Amit Seth te chu Madhya Pradesh High Court judge atan rawt an ni bawk. Supreme Court Collegium hian an mi rawtte sulhnu leh Department of Justice chhinchhiah dana an nihnate hriat chian a nih hnuah, rawtna hi President hnena thlen an nih thu an sawi.