J&K : Ram dang mi dan loa awmte zawng chhuak tur panel din

Jammu and Kashmir thuneitute chuan J&K huam chhunga ram dang mi, January 2011 aṭanga dan loa la awmte dap a, zawng chhuak turin member paruk awmna panel an din. Home department chuan he panel hian thla tin report an buatsaih ṭhin tur thu leh, thla thar ni sarih ni apiangin Union home ministry hnenah an report-te an theh luh ṭhin tur thu an tarlang.

Panel chairperson tur hi home department hnuaia financial commissioner leh additional chief secretary ni bawk a ni ang a, member atan hian Punjab Foreigners Regional Registration Officer (FRRO), Senior superintendent of police te, Jammu leh Srinagar-a J&K Police Criminal Investigation Department te, leh Foreigners Registration Office-a SSP leh SP zawng zawngte an ni dawn a ni.

Kum 2021 khan Jammu and Kashmir police-te hian a ruka raltlan awmte zawn chhuah hna an lo nei tawh a, Myanmar aṭanga Rohingya raltlan 270 man niin, an zingah hian hmeichhia 74 leh naupang 70 an tel. Hiranagar sub-jail-ah dah an ni a, a hnuah jail hi an UT huam chhunga ram dang mi dan loa awmte dah khawm nan an hmang chhunzawm a ni.

J&K-ah hian Rohingya Muslim bakah Bangladesh mi 13,7000 te chu Jammu leh Samba district velah hian an awm niin hriat a ni a, helai hmuna raltlante hi 2008 leh 2016 inkar khan 6,000 zetin an pung hman tih sorkar data chuan a tarlang.