March 2 thleng JNUSU hruaitu hrêng dawn

Ram dodal zawnga thu sawi leh, sorkar laka hela puh an man tak, Jawaharlal Nehru University (JNU) Students' Union president Kanhaiya Kumar chu Nilaini tlai khan Patiala House Court-a hruai a nih hnuin, March 2 thleng judicial custody-a dah chhunzawm turin court chuan a rel.

Patiala House Court-a Kumar-a hruai a nih hian amah thlawptu pungkhawm, zirlai rual bakah media mite chu court complex pawn lamah lawyer hoin an lo bei leh. Lawyer rualte chuan India dodal zawnga thiltih an duh loh thu leh, JNU chu ram dodaltute awmna a ni tiin khar tura an phut thute an sawi. Kanhaiya Kumar pawh court panpui a nih lai hian mi ṭhenkhatin kut an lo thlak hman bawk.

Metropolitan Magistrate Lovlen-an Kumar-a chungthu a ngaihtuahnaah hian court room chhungah a aiawh ukil paruk bakah, JNU professor pakhat leh journalist panga chauh an awm phalsak a ni.

Kumar-a aiawha ding, advocate Vrida Grover leh Sushil Bajaj-te chuan magistrate hnenah hian Supreme Court-in a hriattir chungin an client chu court compound chhungah kutthlak a nih vangin Delhi Police-te chuan dan leh thupek an lekkawh zo lo niin an sawi. Kumar-an amah khawih tumtu chu man turin police official-te chu ngen mah se, police-te chuan an chhuah zalen niin an sawi bawk.

Rahul-an President a hmu :

Congress vice president Rahul Gandhi chuan nimin khan President Pranab Mukherjee hmuin, JNU buaina tawk mek chungchang a sawipui. Gandhi chuan Rashtriya Swayamsevak Sangh ( RSS) leh Prime Minister Narendra Modi-a kaihhruai NDA sorkarin zirlaite aw chhuah thei loa rahbeh an tum a, RSS chuan ramchhung hmun hrang hranga zirlaite hnenah an thuthlung tuh an tum a ni, a ti.

JNU buaina kalzelah lawyer-ten zirlai leh media mite kut an thlak chu sawi≠chhuakin, Congress hruaitu chuan, "Media miten beih an tawh laiin Delhi Police-te chuan lo dan tumin eng thil mah an ti lo. Heng thil thlengte hian khawvel mi≠t≠hmuhah Delhi a tihmelhem hle a ni" tiin a sawi. Rahul Gandhi hian a hmain JNU campus-ah an zirlai pawl hruaitu chhuah phuta zirlai nawrh huaihawtte a lo tlawh tawh bawk.

Minister of State for Home Kiren Rijiju chuan Nilaini tlaia Patiala House Court-a media mite kutthlaktu, lawyer-te chu hrem ngei a tiam.

Kejriwal-an central a dem:

Delhi Chief Minister Arvind Kejriwal-a chuan Patiala House Court pawn lama lawyer-ten zirlai leh media mite an bei chu a dem thu sawiin, Delhi Police-te chu tharum thawhna thleng dang zo loah a puh. Delhi CM chuan JNU-a sorkar leh ram dodalna thu auchhuah puitu zirlai chungah chuan action lak ngei a ngai a, mahse tun thlengin sorkar laipuiin a mawhphurtu zirlaite a la man thei lo chu a dem thu a sawi bawk.

Kejriwal-a chuan, "He sorkar hian zirlai 4-5 vel lek, ram dodalna thu auchhuah puite chu a la manchhuak thei lo a ni. Hetiang a nih chuan engtinge Pathankot airbase beitute chu a man theih tehlul ang?" a ti. Kejirwal hian JNU buaina punlun zel avangin hma lak dan tur sawpuiin nimin khan President a hmu a ni.

Kumar-a puhna finfiahna awm lo :

JNUSU President hian university campus chhunga zirlai pawl pakhatin kum 2001-a Parliament beitu, Afzal Guru-a thlawpna lantirna inkhawm an buatsaihah India dodalna leh sorkar laka helna lam thu sawiah BJP zirlai pawl, ABVP leh BJP MLA OP Sharma te chuan an puh a, hei vang hian Delhi Police-ten an man a ni. Mahse Home Ministry chuan sorkar laka helna thu sawia puhna finfiahna a awm lo nia an hriat thu an sawi a, hei vang hian Kumar-a thubuai pawh hi hnuhdawh a ni leh mai thei nia rin a ni.

Hetihlai hian Delhi Police-te chuan JNUSU president hi a dik lo a ni tih finfiahna tur an nei niin an sawi thung.

Delhi Police-ten February 9-a JNU zirlai ṭhenkhatten campus-a Afzal Guru puala hun an hman dan report a siamah, JNU zirlaite hian bawngsa an ei a, pathian≠nu Durga aiah Mahishasur an biak bawk avangin ram dodaltu an ni ngei a ni, tiin a tarlang tel.

Campus-ah chuan pawl inthup pahnih - Democratic Studentsí Union leh Democratic Studentsí Federation (DSF) awmin, heng pawlte hi ram leh vantlang dodal zawnga che ṭhin an ni, a ti. DSF member-te chuan police report hi na taka sawiselin, an pawl hming tihchhiat tuma dawt phuahchawpah an puh a, an puhna finfiahna tur pholang turin an cho let bawk.

BJP zirlai pawl hruaitu pathum bang :

BJP zirlai pawl, ABVP Jawaharlal Nehru University chapter office bearer pathum chuan university buaina chung≠changa BJP kaihhruai sorkar laipui chetdanah an lungawi loh avangin banna an thehlut. Zirlai hruaitu pathumte chuan thu≠chhuah inṭawm siamin, "Zirlaite zalenna awpbeh sak tumtu sorkar kut leh ke nih chhunzawm hi kan duh tawh lo a ni" an ti. Banna thehlutte hi AVBP JNU unit-a joint secretary, School of Social Sciences unit president leh Ankit Hans secretary-te an ni a, ABVP aṭanga an chhuah thu leh, an pawl kaihhnawih thilah pawh an inlakhran nghal thu an sawi.

AISF in kawngzawh huaihawt:

JNU zirlaiten an pawl hruaitu man a nih avanga lungawi lohna an lantir mek chu zirlai pawl dangten an thlawp. Nimin khan All India Students Federation (AISF) chuan JNUSU president man anih avanga lungawi lohna lantirin Mandi House aṭangin Jantar Mantar thleng kawngzawh an huaihawt. He kawngzawh hi Allahabad University zirlaite bakah, Aligarh Muslim University leh Film and Television Institute of India (FTII) zirtituten an zawm a, Hyderabad University zirlaite pawh an tel bawk.

Scientist leh academic-ten JNU zirlai hruaitu thlawp:

Ramchhung zirna in hrang hranga scientist leh academics-te chuan JNU zirlai hruaitu man a ni chu an dem thu sawiin, JNU chu a zirlaite venghim tura hma la tawk loah an puh. Mithiam rualte hian JNU chuan a zirlaite chu midangten kut an thlak tur lakah a venghim zo lo a ni tiin, zirlaite himna tura hma la turin an phut bawk.

Zirlaiten an duhzawngte sawi tura zalenna an neihte chu humhalh sak turin university thuneitute chu an phut a, "Ram dodal zawnga thusawia puh zirlaite hi chhuah zalen an ni leh, an laka thubuai thehlutte tihtawp a nih theih nan chak taka hma in lak ngei kan beisei a ni" tiin university thuneitute chu an nawr a ni. Mithiam rualte hian petition siamin, hetah hian mi 379 in hming an ziak a, hming ziakte hi senior academic leh scientist-te an ni.

SC-in Kumar-a bail dilna ngaihtuah dawn:

Supreme Court chuan vawiin hian Kanhaiya Kumar bail dilna a ngaihtuah dawn. A dilna hi vawiin chawhma hian ngaihtuah a ni ang. Kumar chuan Patiala House Court-ah khan buaina a chhuah avangin bail-a chhuah pawh a dil ngam lo a, a nunna atana hlauhthawnawm niin a sawi. Patiala House-ah hian lawyer ṭhenkhatten kut an thlak bakah, courtroom-ah mi dang pakhatin kut a thlak zui leh niin a sawi.