Jats te nawrh huaihawtnaah mi 10 an thi Delhi school te khar dawn

Haryana-a Jats hnamten sorkar hna leh zirna ina an hnam tana reservation siam phuta nawrh an huaihawt chu an chhunzawm zel a, nawrh huaihawtna hmuna tharum thawhna chhuak avangin mi 10 an thi a, midang 150 chuangin hliam an tuar.

Nawrh huaihawtte hian nimin khan Haryana-a rel station pakhat an hal a, Delhi-Chandigarh highway an dang bawk. Jind-ah petrol pump an hal bakah kawngpui an dang tel bawk a ni. Buaina chhuak hian zual lam a pan zel avangin nimin khan venhim hna thawk turin Haryana-ah sipai 1,200 tirh belh an ni.

Director general of police, YP Singhal chuan,"Army colum 69-ten Haryana hi an thleng tawh a, an zinga a tam ber Jhajjar leh Rohtak ah dah an ni" a ti. Rohtak khuaah hian nawrh huaihawt avangin ni eng emaw zat chu khawchhung mite hi pawn chhuak thei loin an awm tawh a, heng mite hi sipaite hian an theih angin an pui a ni.

Haryana minister Anil Vij chuan tharum thawhna a thlen reng chhung chuan Jats hnam nen chuan inbiakna neih theih a nilo tiin, state sorkar nena inbiakan nei tura committee an din a ngai a ni, a ti. Nawrh huaihawtte chuan hruaitu mumal an nei lo a, an duh dan angin an kal mai a ni, a ti.

Vij chuan Haryana-a BJP sorkar chuan Jats hnam chu OBC quota pek a duh reng tih sawiin, "Central leh State-a BJP sorkar chuan Jats-te OBC quoata pek hi a duh reng a, mahse hemi atan hian Jats hnam hian hun min pek a ngai dawn a ni" tiin a sawi.

Chief Minister Manohar Lal Khattar bakah political hruaitu hrang hrangte chuan Jats-te hi tharum thawhna bansan turin an ngen a ni. Nimin khan state sorkar chuan emergeny meeting a ko a,dan leh thupek kenkawh dan turte an sawiho.

Jats nawrh huaihawtte hian Delhi khawpui chhim lam tui chawmtu, Munak Canal chu an khawih chhiat avangin khar a ni a, hei vang hian Delhi chuan tui supply lamah harsatna a tawh mek. Delih sorkar chuan khawpui chhungah tui an dawn ṭhat theih loh avangin vawiin hian school zawng zawng khar turin hriattirna a tichhuak. Vawiin thleng hian khawpui chhung hmun zaa ṭhena hmun sawmruk vel chuan tui hi an la dawng thei dawn lo nia sawi a ni.

Delhi sorkar chuan tui an dawn mumal loh avangin an dawn chhunte chu khawpuia chengte tan rualkhai taka sem a ni dawn tih a sawi. Delhi Chief Minister Arvind Kejriwal chuan mipuite chu tui renchem turin a ngen nghal bawk.

Sorkar laipui chuan Haryana state sorkar hnenah Delhi khawpui tui supply a buai lohna tura hma la turin a hriattir. Cabinet Secreary PK Sinah chuan nimin khan Haryana Chief Secretary chu biain, Delhi khawpuia tui supply chu dah pawimawh hmasa turin a hrilh a, khawpui tana tui supply chu a balhlah lohna tura hma la tur te, tharum thawhna thlen zawnga chete chungah state sorkar chuan dan leh thupek khauh taka lekkawh tur tein a hrilh a ni.