Kanhaiya Kumar bail dilna ngaihtuah a ni dawn

Jawaharlal Nehru University Students' Union (JNUSU) president Kanhaiya Kumar bail dilna chu Thawhlehni hian ngaihtuah a ni dawn.

Kanhaiya Kumar chuan India dodalna thu sawiah an puh chungchang sawifiahin," University-a buaina chhuak-ah khan zirlai hruaitu ka nih angin thu ka sawi a, amaherawh chu India dodal zawngin thu ka sawi lo" a ti. Kumar-a thupuangtu chuan,"Dik lo taka man a ni a, FIR tehluha thuziak ṭhenkhat chu a dik tawk lo a ni" a ti. Bail an dilna chu hnawl a lo ni tawh tih a sawi bawk.

Kanhaiya Kumar chuan tihdik loh a nei lo a, tun thlengin a puhna finfiahna hmuh tur pawh a la awm lo tih a sawi.

Kumar-a ukil Sushil Bajaj leh Vrinda Grover te chuan Supreme Court-a bail an dilna chu pawm a nih loh avangin High Court lamah an thlen leh a ni. High Court hi Patiala House Court atanga hla lo te a awm a ni a, buaina a chawk chhuak leh ang tih thuneitu te chuan an hlau hle. Patiala House Court kawtah hian Kanhaiya Kumar tlawptu te leh lawyer te an lo innawrbuai tawh a, hei vang hian venhim hna thawktu pawh dah belh an ni.

Hetihlai hian sipai bangte chuan JNU campus-ah ram dodalna lam hawiin hun buatsaih a ni tia sawi chu an duh lohna lantirin nimin khan Delhi-ah kawng an zawh. Kawng zawhnaah hian BJP leh RSS worker-te pawh an tel a ni.

Major General (Retd) Dhruv C Katoch chuan kawngzawh an huaihawtah political party te a in hnamhnawih lo tih a sawi. "JNU campus-ah ram dodalna leh sorkar laka helna thu an aupui nia sawi a nih vangin, hei hi kan duhlohna kan lantirna a ni" a ti. He thil hi India ram tihbuai tumte thiltih a ni, tiin a sawi.